Прамовы і інтэрв’ю

Гігін: форум "Беларусь адзіная" дае магчымасць фармуляваць вобраз будучыні нашай краіны

8 верасня, Магілёў /Кар. БЕЛТА/. Форум "Беларусь адзіная" дае магчымасць сфармуляваць вобраз будучыні нашай краіны. Такім меркаваннем з журналістамі падзяліўся генеральны дырэктар Нацыянальнай бібліятэкі Беларусі, старшыня праўлення РДГА "Беларускае таварыства "Веды" Вадзім Гігін у час рэспубліканскай інфармацыйна-асветнай акцыі "Беларусь адзіная", якая сёння праходзіць у Магілёўскім дзяржаўным універсітэце імя А.А.Куляшова, перадае карэспандэнт БЕЛТА.

"Галоўная ідэя, якая нас аб'ядноўвае, - гэта вобраз будучыні для Беларусі. І мы ўжо бачым, што акцыі "Беларусь адзіная", якія прайшлі ўжо, даюць магчымасць сфармуляваць гэты вобраз будучыні, - адзначыў Вадзім Гігін. - І мы так падбіралі спікераў, каб гэта былі прадстаўнікі самых розных сфер".

У час дыялогу ўдзельнікі сустрэчы задаюць спікерам свае пытанні праз спецыяльны чат-бот. І да кожнага паведамлення адносяцца з вялікай увагай. "Гэта форма арганізацыі дыскусіі наватарская, але запатрабавана аўдыторыяй, паколькі дае магчымасць выбудаваць больш адкрыты дыялог", - падкрэсліў гендырэктар Нацыянальнай бібліятэкі.

Паводле слоў Вадзіма Гігіна, сур'ёзнае значэнне мае той факт, што сустрэча праходзіць у сценах універсітэта. Менавіта тут збіраецца актыўная і прагрэсіўная моладзь, тут фарміруюцца кадры, якія ў будучым будуць не толькі вучыць новае пакаленне, але і займацца яго развіццём і выхаваннем. Ад горада да горада напаўненне акцыі крыху мяняецца, абмяркоўвалі новаўвядзенні ў школьнай адукацыі, эканамічны складнік і перспектывы народнай гаспадаркі Беларусі, інфармацыйную бяспеку. Тут многае залежыць ад спікера. "Мы стараемся так іх падбіраць, каб яны былі яркія не толькі за кошт слоў, якія прамаўляюць, што таксама вельмі важна, а за кошт сваіх дасягненняў, сваёй асобы", - падзяліўся ён.

Пошук новых форм узаемадзеяння з аўдыторыяй не павінен спыняцца, гаворыць Вадзім Гігін. "Калі мы ўбачылі, што форма перастае даваць 100-працэнтную аддачу ад узаемадзеяння з людзьмі, гэта не значыць, што ад такой формы трэба адмаўляцца. Трэба ўносіць змяненні, - адзначыў ён. - Тая мадэль (узаемадзеяння. - Заўвага БЕЛТА), якую мы прапанавалі на нашай акцыі, улічвае вопыт "Марафону адзінства". Паглядзіце, на які ўзровень мы паднялі гэту работу. Ён даў нам шмат форм узаемадзеяння з людзьмі. І мы не павінны гэта страціць. Трэба гэта маштабаваць, развіваць, узбагачаць нейкімі новымі фішкамі".

Форма ва ўзаемадзеянні з людзьмі, бясспрэчна, важная. Але самае галоўнае - змест такіх сустрэч і асоба спікера.

Форум сабраў сёння ў магілёўскай ВНУ каля 600 чалавек: студэнтаў ВНУ і навучэнцаў каледжаў, выкладчыкаў і прафесараў, прадстаўнікоў грамадскіх аб'яднанняў і арганізацый горада.

Рэспубліканская інфармацыйна-асветная акцыя "Беларусь адзіная" традыцыйна праходзіць па ўсёй краіне з 2021 года напярэдадні 17 верасня - Дня народнага адзінства. Акцыя нацэлена на абмеркаванне арыенціраў будучыні.

версія для друку

зрабіць стартавай

дабавіць у выбранае