Прамовы і інтэрв’ю

Дэпутат: у беларускіх ВНУ павінна быць больш філіялаў кафедраў у рэгіёнах

Мікалай Шаўчук

5 лютага, Мінск /Кар. БЕЛТА/. Беларускім ВНУ варта было б адкрываць больш філіялаў кафедраў у рэгіёнах. Такое меркаванне ў час чарговага пасяджэння праекта "Экспертнае асяроддзе" - "11 цэнтраў прыцягнення. Рэгіянальныя драйверы росту" ў прэс-цэнтры БЕЛТА выказаў старшыня Пастаяннай камісіі Палаты прадстаўнікоў Нацыянальнага сходу па аграрнай палітыцы Мікалай Шаўчук.

Парламентарыі вывучаюць праблемы, з якімі сутыкаюцца прадпрыемствы ў рэгіёнах. Напрыклад, у Салігорску адчуваюць недахоп кадраў. "Філіял факультэта, які рыхтуе спецыялістаў для горназдабыўной прамысловасці, трэба рабіць у Салігорску. Памяшканняў там хапае. Прыедуць выкладчыкі, лекцыі пачытаюць. З'явіцца сваё вучонае асяроддзе, якое будзе працаваць на гэтым прадпрыемстве. І не трэба гэтага баяцца. Сістэма адукацыі павінна быць рухомай, ісці за кропкамі развіцця эканомікі", - лічыць Мікалай Шаўчук.

"Калі Салігорск стане ўніверсітэцкім горадам і тут можна будзе атрымаць вышэйшую адукацыю, то людзі адтуль нікуды не паедуць. У гэтым горадзе кожная сям'я звязана з шахтай. А калі чалавек паехаў вучыцца ў Мінск, то са сталіцы будзе вяртацца неахвотна. Ён будзе чапляцца за Мінск, таму што ўжо прывык, знайшоў сяброў, падабраў сабе работу", - адзначыў дэпутат.

Меркаванне Мікалая Шаўчука падзяляе аналітык Беларускага інстытута стратэгічных даследаванняў (БІСД) Андрэй Чарнабай. Ён нагадаў, што ў савецкія гады існавала практыка, калі маладыя людзі яшчэ будучы студэнтамі атрымлівалі на заводах неабходныя веды і навыкі, першыя рабочыя спецыяльнасці і ў выніку замацоўваліся на прадпрыемстве. "Не бачу асаблівых праблем. Можа, Мінадукацыі па-іншаму скажа, але чаму не зрабіць у тым жа Салігорску філіял БНТУ? Няхай гэта будзе шматузроўневая сістэма. Ліцэй, каледж і потым ужо вышэйшая адукацыя. І няхай людзі працуюць, вучацца. Толькі карысць ад гэтага будзе", - упэўнены аналітык БІСД.

версія для друку

зрабіць стартавай

дабавіць у выбранае