Прамовы і інтэрв’ю

27 лістапада, Мінск /Кар. БЕЛТА/. Беларусь мае намер выконваць паказчыкі Мэт устойлівага развіцця (МУР) пры рэалізацыі дзяржпраграм рознага ўзроўню. Аб гэтым сёння паведаміла нацыянальны каардынатар па дасягненні МУР, намеснік старшыні Савета Рэспублікі Нацыянальнага сходу Мар'яна Шчоткіна на сустрэчы з місіяй MAPS, перадае карэспандэнт БЕЛТА.

У ліку галоўных задач Савета па ўстойлівым развіцці Мар'яна Шчоткіна назвала "імплементацыю паказчыкаў МУР у рэспубліканскія, галіновыя, рэгіянальныя праграмы рознага ўзроўню". Акрамя таго, плануецца распрацаваць дарожную карту, план, у які з розных праграм былі б зведзены ўсе мерапрыемствы па дасягненні Мэт устойлівага развіцця.

Мар'яна Шчоткіна адзначыла, што ў Беларусі выбудавалі нацыянальную архітэктуру кіравання МУР, куды ўваходзіць і Савет па ўстойлівым развіцці. Нацыянальны каардынатар падрабязна расказала аб яго структуры, ён падзелены па чатырох асноўных сектаральных групах (эканоміка, экалогія, сацыяльная палітыка і статыстычныя даныя). Місіі MAPS таксама былі прадстаўлены Нацыянальная стратэгія ўстойлівага развіцця да 2030 года і Праграма сацыяльна-эканамічнага развіцця на 2016-2020 гады.

Віцэ-спікер падкрэсліла, што Беларусь у частцы дасягнення Мэт устойлівага развіцця працуе па ўсіх напрамках. Пытанне знаходзіцца на кантролі кіраўніка дзяржавы. Мар'яна Шчоткіна выказала надзею, што ўзаемадзеянне з місіяй MAPS дасць магчымасць эфектыўней і хутчэй рушыць наперад па гэтым шляху.

Эксперты місіі ў сваю чаргу высока ацанілі работу, якую правяла Беларусь для выканання Мэт развіцця тысячагоддзя. Краіна, на іх думку, цяпер ужо з'яўляецца прыкладам у плане дасягнення МУР.

Місія MAPS створана ў 2015 годзе для падтрымкі намаганняў дзяржаў па ажыццяўленні Парадку дня ў галіне ўстойлівага развіцця на перыяд да 2030 года і дасягненні МУР. Асноўная задача экспертаў - пошук спосабаў садзейнічання дзяржавам, а таксама слабых месц, на якія неабходна звярнуць увагу на нацыянальным узроўні для паляпшэння агульнай карціны з МУР. На працягу пяці дзён спецыялісты праводзяць у краіне сустрэчы ў профільных дзяржаўных органах для аналізу стартавых умоў для дасягнення Мэт устойлівага развіцця. У выніку місія распрацоўвае для краіны дарожную карту, якая мае рэкамендацыйны характар.