Падзеі, факты, анонсы

У параўнанні з папярэднім спісам беларускія хакеісты страцілі адну пазіцыю. Нацыянальнай зборнай налічана 880 ачкоў. Яна стала лепшай сярод тых, хто пацярпеў няўдачу ў фінальнай алімпійскай кваліфікацыі перад Гульнямі-2018. Цяпер у актыве галоўнай хакейнай каманды краіны 3200 ачкоў за чатырохгадовы цыкл. Гэтай сумы не хапіла, каб захаваць 10-ы радок у сусветным рэйтынгу. Месца ў топ-10 беларусы ўступілі хакеістам Славакіі. На Алімпіядзе ў Пхёнчхане гэта каманда фінішавала 11-й, што прынесла 920 рэйтынгавых ачкоў. Цяпер у гэтай каманды іх 3220 і яна на 20 пунктаў наперадзе беларусаў.

У пачатку сусветнага хакейнага рэйтынгу засталася каманда Канады. Пацясніць яе з вяршыні маглі расіяне ў выпадку заваявання залатых узнагарод і непападання на п'едэстал роданачальнікаў хакея. У выніку расійскія атлеты перамаглі ў алімпійскім хакейным турніры, але і канадцы без медалёў не засталіся, узяўшы бронзу.

Становішча каманд у верхняй частцы сусветнага рэйтынгу ІІХФ цяпер такое:

1 (1). Канада - 4045 ачкоў,

2 (2). Расія - 4040,

3 (3). Швецыя - 3850,

4 (4). Фінляндыя - 3820,

5 (6). Чэхія - 3740,

6 (5). ЗША - 3725,

7 (8). Германія - 3610,

8 (7). Швейцарыя - 3405,

9 (9). Нарвегія - 3310,

10 (11). Славакія - 3220,

11 (10). Беларусь - 3200.

Зборная Славеніі, якой беларуская каманда ўступіла пуцёўку на Гульні ў Пхёнчхан, засталася на 15-м месцы ў гэтым спісе (3010). Найбольшага прагрэсу ў рэйтынгу пасля Алімпіяды дабілася каманда Рэспублікі Карэя. Нягледзячы на паражэнні ва ўсіх праведзеных матчах, зборная гэтай краіны ўзнялася з 21-й на 18-ю пазіцыю. Усяго ў рэйтынгу ІІХФ вызначаны месцы зборных 48 краін.

Сусветны рэйтынг ІІХФ заснаваны на прысваенні ачкоў за дасягненні каманд на апошніх чатырох чэмпіянатах свету і ў апошнім алімпійскім турніры. У мінулы раз сусветны рэйтынг абнаўляўся ў маі 2017 года пасля чэмпіянату свету ў мацнейшым дывізіёне.