Падзеі, факты, анонсы

Запаліць свечку ў храме і прынесці кветкі. Дзень памяці Хатыні пройдзе 22 сакавіка

Фота з архiва

20 сакавіка, Мінск /Кар. БЕЛТА/. У "Хатыні" 22 сакавіка пройдуць мерапрыемствы, прысвечаныя 82-й гадавіне з дня трагедыі беларускай вёскі. Пачнуцца яны літургіяй у храме ў гонар Раства Прасвятой Багародзіцы, які знаходзіцца на тэрыторыі мемарыяльнага комплексу. Аб гэтым карэспандэнту БЕЛТА расказалі ў адміністрацыі мемарыяла.

У дзень усенароднай памяці Хатыні ў храме ў гонар Раства Прасвятой Багародзіцы, узведзеным на тэрыторыі мемарыяла, у 8.00 пачнецца літургія, узначаліць яе епіскап Барысаўскі Мар'інагорскі Амвросій, затым адбудзецца памінальная літыя. Храм у "Хатыні" будзе адкрыты для наведвання да 19.00.

"У гэты дзень пройдзе шэсце, якое атрымала неафіцыйную назву "народнае ўскладанне", з удзелам прадстаўнікоў улады, працоўных калектываў, грамадскіх і маладзёжных арганізацый. Чакаецца, што мемарыял наведаюць больш за 3 тыс. чалавек, у тым ліку гасцей з Расіі і іншых краін СНД", - расказалі ў адміністрацыі, адзначыўшы, што ў дні напярэдадні сумнай даты ў "Хатыні" колькасць гасцей павялічваецца.

"Установы адукацыі загадзя запланавалі наведванне нашага музея, экскурсіі распісаны не толькі на сакавік, але і на іншыя месяцы. Напрыклад, сёння актыўна праходзяць урокі памяці для школьнікаў. Хацелася б таксама нагадаць, што такія ўрокі для дзяцей у музеі мы арганізуем па папярэднім запісе на працягу ўсяго года", - расказалі ў адміністрацыі.

Каб у дзень памяці спаленай вёскі мемарыял наведала як мага больш жадаючых, у "Хатынь" 22 сакавіка будзе курсіраваць з Мінска спецыяльны аўтобусны маршрут нумар 659.

З пачатку года мемарыяльны комплекс "Хатынь" наведалі больш за 30 тыс. чалавек.

версія для друку

зрабіць стартавай

дабавіць у выбранае