Падзеі, факты, анонсы

14 сакавіка, Мінск /Кар. БЕЛТА/. Візітку IVANa (Аляксандра Іванова) для міжнароднага конкурсу "Еўрабачанне-2016" будуць здымаць у Беларусі 30-31 сакавіка. Такую інфармацыю са Стакгольма прадаставіла каардынатар праектаў Белтэлерадыёкампаніі і Еўрапейскага вяшчальнага саюза (ЕВС) Вольга Саламаха, паведамілі БЕЛТА ў прэс-службе медыяхолдынга.

Вольга Саламаха ў складзе афіцыйнай беларускай дэлегацыі ўдзельнічае ў традыцыйнай і абавязковай сустрэчы кіраўнікоў дэлегацый краін - удзельніц "Еўрабачання".

Для здымак відэавізіткі будзе выбрана некалькі мясцін, каб як мага лепш прадставіць нашага артыста і інтэграваць яго ў шоe грандыёзнага песеннага форуму. У сваю чаргу, у візітку будзе інтэграваны лагатып цяперашняга "Еўрабачання" - дзьмухавец.

На сустрэчы беларуская дэлегацыя прадаставіла арганізатарам увесь пакет матэрыялаў, неабходны для ўдзелу афіцыйнага прадстаўніка Беларусі ў міжнародным конкурсе. Арганізатары ж расказалі аб канцэпцыі шоу і макеце сцэны, а таксама арганізавалі экскурсію па "Глобен-арэне" - пляцоўцы правядзення конкурсу.

Прадстаўнікі Белтэлерадыёкампаніі правялі перагаворы з тэхнічнымі службамі па пытаннях пастаноўкі нумару, абмеркавалі з кіраўнікамі дэлегацый краін - удзельніц другога паўфіналу, у якім выступае IVAN, праграму ўзаемнага прамаціравання.

12 сакавіка па запрашэнні кіраўніцтва ЕВС удзельнікі беларускай дэлегацыі ўпершыню ацэньвалі выступленні фіналістаў Melodifestivalen у якасці членаў журы. Прадстаўнікі медыяхолдынга адзначылі высокі ўзровень арганізацыі нацыянальнага шведскага адбору.

Фінал "Еўрабачання-2016" адбудзецца ў Стакгольме 14 мая, паўфіналы намечаны на 10 і 12 мая.

Прадстаўнік Беларусі IVAN выступіць у першай частцы другога паўфіналу. Разам з ім за выхад у фінал будуць змагацца выканаўцы з Албаніі, Аўстраліі, Бельгіі, Балгарыі, Даніі, Македоніі, Грузіі, Ірландыі, Ізраіля, Латвіі, Літвы, Нарвегіі, Польшчы, Румыніі, Сербіі, Славеніі, Швейцарыі і Украіны. Усяго ў песенным форуме прымуць удзел 43 краіны.

Прамую трансляцыю двух паўфіналаў і фіналу традыцыйна будуць весці тэлеканалы Белтэлерадыёкампаніі - "Беларусь 1" і міжнародны спадарожнікавы "Беларусь 24".