Падзеі, факты, анонсы

Выставу "Крылы вечнасці" аб традыцыях яўрэяў Беларусі прадставяць у Мірскім замку

Фота mirzamak.by

11 сакавіка, Гродна /Кар. БЕЛТА/. Традыцыйнае рытуальнае адзенне, карціны, прадметы і фатаграфіі, што расказваюць аб нацыянальных традыцыях, з калекцыі Музея гісторыі і культуры яўрэяў Беларусі, фондаў музея "Замкавы комплекс "Мір" і іншых калекцый прадставяць на выставе "Крылы вечнасці" ў Мірскім замку, паведамілі карэспандэнту БЕЛТА ва ўстанове культуры.

Часовая экспазіцыя "Крылы вечнасці", падрыхтаваная Музеем гісторыі і культуры яўрэяў Беларусі пры Саюзе беларускіх яўрэяў грамадскіх аб'яднанняў і суполак, адкрыецца 14 сакавіка.

"Гэта ўнікальная выстава раскрывае ўвесь цыкл яўрэйскага жыцця ад нараджэння да смерці праз таліт (малітоўнае пакрывала) як элемент традыцыйнага рытуальнага адзення. За кожным экспанатам стаіць гісторыя жыцця яго гаспадара: бо таліт суправаджае яўрэйскага мужчыну ў самыя важныя моманты жыцця", - расказалі ў музеі.

На часовай экспазіцыі будуць прадстаўлены таліты з калекцыі Музея гісторыі і культуры яўрэяў Беларусі, фондаў музея "Замкавы комплекс "Мір", яўрэйскага культурнага таварыства "Эмуна", сінагогі Хабад і прыватных калекцый. Дапоўняць выставу маляўнічыя палотны вядомага беларускага мастака Юрыя Крупянкова, на якіх узнаўляецца атмасфера старадаўніх мястэчак, дзе побач жылі прадстаўнікі розных нацыянальнасцей і канфесій, панаваў непаўторны каларыт.

На выставе таксама будуць прадстаўлены прадметы і фатаграфіі, што нясуць інфармацыю аб яўрэйскай суполцы ў Беларусі, аб нацыянальных традыцыях і звычаях. Выстава "Крылы вечнасці" прадоўжыцца ў Мірскім замку да 11 красавіка.

версія для друку

зрабіць стартавай

дабавіць у выбранае