16 чэрвеня, Мінск /Святлана Міховіч - БЕЛТА/. Выстаўка "Васіль Быкаў. Доўгая дарога дадому..." адкрыецца ў Міністэрстве замежных спраў 20 чэрвеня. Аб гэтым паведаміў журналістам начальнік упраўлення інфармацыі - прэс-сакратар МЗС Дзмітрый Мірончык, перадае карэспандэнт БЕЛТА.
"У Міністэрстве замежных спраў Беларусі 20 чэрвеня ў 15.30 адбудзецца ўрачыстае адкрыццё выстаўкі Дзяржаўнага музея гісторыі беларускай літаратуры "Васіль Быкаў. Доўгая дарога дадому...", прымеркаванай да 75-й гадавіны пачатку Вялікай Айчыннай вайны. Выстаўку адкрые намеснік міністра замежных спраў Алена Купчына", - адзначыў Дзмітрый Мірончык.
Дзмітрый Мірончык расказаў, што літаратурна-дакументальны выставачны праект "Васіль Быкаў. Доўгая дарога дадому..." створаны паводле матываў аднайменнай апошняй прыжыццёвай кнігі пісьменніка. "Аўтарамі фотаработ з'яўляюцца розныя людзі, у тым ліку малодшы сын пісьменніка - Васіль Быкаў, гісторык мастацтва, намеснік дырэктара Віцебскага абласнога краязнаўчага музея Валерый Шышанаў, саветнік пасольства Беларусі ў ФРГ Аляксей Жбанаў і першы сакратар пасольства ў Чэхіі Андрэй Кухарчык. Экспанатамі выстаўкі сталі таксама дакументы, рукапісы, вокладкі кніг, малюнкі Васіля Быкава з фондаў Дзяржаўнага музея гісторыі беларускай літаратуры і асабістага архіва пісьменніка", - растлумачыў ён.
На цырымонію адкрыцця запрошаны кіраўнікі і прадстаўнікі дыпламатычных місій, акрэдытаваных у Беларусі, а таксама прадстаўнікі творчай інтэлігенцыі.