Падзеі, факты, анонсы

Выданне БЕЛТА "Суперпазіцыя. Паралельныя сусветы" ўдастоена спецдыплома міжнароднага конкурсу "Мастацтва кнігі"

4 снежня, Масква /Эдуард Півавар - БЕЛТА/. Выданне БЕЛТА "Суперпазіцыя. Паралельныя сусветы" ўдастоена спецыяльнага дыплома XXII Міжнароднага конкурсу дзяржаў - удзельніц СНД "Мастацтва кнігі". Цырымонія ўручэння ўзнагарод адбылася 4 снежня ў Маскве ў Гасціным двары на міжнародным кірмашы інтэлектуальнай літаратуры non/fictio№27, перадае карэспандэнт БЕЛТА.

Кніга выдадзена выдавецтвам БЕЛТА пры падтрымцы Міністэрства інфармацыі Беларусі. Ідэяй паслужыла выстава БЕЛТА "Паралельныя сусветы". На плакатах экспазіцыі былі адлюстраваны два сусветы: свет дзяржавы - стваральнай працы і развіцця і свет апазіцыі - разбурэння і дэградацыі. Фота праекта наглядна дэманструюць, што зроблена ў Беларусі ўладай за апошнія 30 гадоў і што стала за гэтыя гады з апазіцыяй. Дзеянні і лозунгі, стварэнне і разбурэнне - аб гэтым выстава і кніга.

Аўтарам тэкстаў да кнігі "Суперпазіцыя. Паралельныя сусветы" выступіў кіраўнік аналітычнага цэнтра ЕсооМ, член навукова-экспертнай групы пры Дзяржаўным сакратарыяце Савета бяспекі Рэспублікі Беларусь Сяргей Мусіенка. Ён быў не толькі відавочцам, але і непасрэдным удзельнікам шматлікіх палітычных працэсаў у краіне за апошнія 30 гадоў. Тэксты заснаваны на фактах і статыстыцы розных гадоў і ў той жа час прапушчаны праз прызму ўласнага вопыту.

У кнізе сабраны матэрыялы з прэсы сярэдзіны 1990-х гадоў - як дзяржаўнай, так і апазіцыйнай, - якіх няма ў шырокім доступе. У іх адлюстравана, чым жыла краіна на пачатку станаўлення сваёй незалежнасці, з якімі праблемамі і выклікамі сутыкаліся беларусы і як гэтыя праблемы вырашаліся маладой дзяржавай.

Архіўныя матэрыялы, актуальная статыстыка і скрыны сайтаў сучасных СМІ, прадстаўленыя ў выданні, паказваюць розныя пазіцыі "паралельных сусветаў". Кніга дае магчымасць прааналізаваць шматгадовыя спробы апазіцыі сказіць рэальнасць у Беларусі, з аднаго боку, і намаганні ўлады па развіцці краіны - з другога.

Праект БЕЛТА "Суперпазіцыя. Паралельныя сусветы" быў удастоены Гран-пры "Залатой Літары", узнагароды нацыянальнага конкурсу "Мастацтва кнігі", яго прэзентацыі прайшлі практычна ва ўсіх абласцях Беларусі, у многіх ВНУ і іншых навучальных установах краіны.

У гэтым годзе на міжнародны конкурс дзяржаў - удзельніц СНД "Мастацтва кнігі" ўсяго паступіла 66 выданняў з 6 краін. Выдавецтвы Рэспублікі Беларусь атрымалі 4 узнагароды І ступені і 3 узнагароды ІІ ступені. Галоўны прыз конкурсу - Гран-пры - дастаўся кнізе Аляксандра Аляксеева і Алега Лукашэвіча "Спадчына Беларусі".

версія для друку

зрабіць стартавай

дабавіць у выбранае