6 верасня, Мінск /Кар. БЕЛТА/. Віртуальнымі карыстальнікамі Нацыянальнай бібліятэкі Беларусі з'яўляюцца жыхары 111 краін. Практычна кожны пяты віртуальны карыстальнік - іншаземец, паведаміў сёння журналістам у прэс-цэнтры БЕЛТА дырэктар НББ Раман Матульскі, перадае карэспандэнт БЕЛТА.
Віртуальныя карыстальнікі НББ пражываюць у Расіі, Украіне, Казахстане, ЗША, Германіі, Польшчы, Літве, Латвіі, Малдове, Узбекістане, Вялікабрытаніі і іншых краінах. Іх колькасць з моманту пераезду бібліятэкі ў новы будынак у 2006 годзе павялічылася ў 18 разоў і на 1 жніўня 2017-га складае больш за 86 тыс.
Агульная колькасць карыстальнікаў Нацыянальнай бібліятэкі Беларусі складае 163 тыс., штогод ім выдаецца амаль 2,5 млн экзэмпляраў дакументаў.
Паводле слоў дырэктара НББ, 86 працэнтаў карыстальнікаў - людзі ва ўзросце 16-35 гадоў. Кожны другі чытач НББ - студэнт, кожны чацвёрты - працуючы.
Штогод амаль 18 тыс. чалавек становяцца карыстальнікамі Нацыянальнай бібліятэкі, пры гэтым кожны другі новы карыстальнік наведвае бібліятэку ў аддаленым рэжыме пры дапамозе інтэрнэт-партала.
Раман Матульскі адзначыў, што інфармацыйны рэсурс бібліятэкі налічвае 9,8 млн адзінак захоўвання на розных носьбітах. Кожныя 4 секунды чытачам выдаецца 1 дакумент.
У гэтым годзе Нацыянальная бібліятэка Беларусі адзначае 95-гадовы юбілей.