Падзеі, факты, анонсы
Вялікі тэатр Беларусі правядзе фестываль класічнага тэатральнага мастацтва ў Нясвіжы 14-16 чэрвеня
Фота з архіву
11 мая, Мінск /Кар. БЕЛТА/. "Вечары Вялікага тэатра ў замку Радзівілаў" пройдуць з 14 па 16 чэрвеня дзясяты раз, паведаміла БЕЛТА вядучы рэдактар аддзела інфармацыі Нацыянальнага акадэмічнага Вялікага тэатра оперы і балета Беларусі Алена Балабановіч.
Адкрыецца мерапрыемства 14 чэрвеня ў Тэатральнай зале Нясвіжскага замка канцэртам заслужанай артысткі Беларусі Алены Сало "Партрэты. Клаўдзія Шульжэнка". За фартэпіяна - Таццяна Іванова. Потым у Фарным касцёле Божага Цела прагучыць канцэрт "Беларускай капэлы". Яго рэжысёр заслужаны артыст Беларусі Віктар Скорабагатаў у год святкавання 200-годдзя з дня нараджэння Станіслава Манюшкі падрыхтаваў праграму "З Ойчам Адвечным", складзеную з твораў кампазітара, якія выканаюць вядучыя салісты оперы і артысты аркестра Вялікага тэатра.
"Вечарам унутраны дворык замка Радзівілаў ператворыцца ў італьянскую Верону, дзе, як вядома, нас сустрэнуць падзеі гісторыі, сумнейшай за якую няма ў свеце. Нашы артысты пакажуць балет Сяргея Пракоф'ева "Рамэа і Джульета" ў пастаноўцы народнага артыста СССР і Беларусі мастацкага кіраўніка Вялікага тэатра Валянціна Елізар'ева. Нагадаю, што прэм'ера новай рэдакцыі спектакля паводле матываў шэкспіраўскай драмы адбылася якраз у гэтым годзе. За дырыжорскім пультам будзе Андрэй Галанаў", - расказала вядучы рэдактар.
Для паклоннікаў камернага жанру днём 15 чэрвеня ў Тэатральнай зале ў выкананні вядучых салістаў оперы зноў прагучаць творы Станіслава Манюшкі. А вечарам усіх паклоннікаў оперы парадуе драма Джакама Пучыні "Тоска" ў пастаноўцы галоўнага рэжысёра тэатра Міхаіла Панджавідзэ. Вядучыя партыі выканаюць народныя артысты Ніна Шарубіна, Сяргей Франкоўскі, Васіль Кавальчук, заслужаны артыст Станіслаў Трыфанаў. Дырыжор - Алег Лясун.
16 чэрвеня струнны квінтэт "Серэнада" запрашае сустрэць новы дзень "З песняй па жыцці". У Тэатральнай зале Нясвіжскага замка ў выкананні калектыву, а таксама артыстаў аркестра і салістаў оперы - уладальніцы медаля Францыска Скарыны Таццяны Траццяк, народнага артыста Беларусі Уладзіміра Пятрова і лаўрэата міжнародных конкурсаў Аляксандра Міхнюка - прагучаць песенныя хіты савецкага кінематографа.
"Завершыць традыцыйны фестываль класічнага тэатральнага мастацтва ў Нясвіжы гала-канцэрт зорак оперы і балета. У праграме - вядомыя оперныя арыі і дуэты, яркія нумары балетных шэдэўраў, шлягеры сусветнай музычнай спадчыны. Дырыжор - Вячаслаў Чарнуха-Воліч", - анансавала Алена Балабановіч.
версія для друку
зрабіць стартавай
дабавіць у выбранае