Падзеі, факты, анонсы
Вялікі тэатр Беларусі ў ноч з 13 на 14 студзеня правядзе навагодні баль
29 снежня, Мінск /Кар. БЕЛТА/. Нацыянальны акадэмічны Вялікі тэатр оперы і балета Беларусі ў ноч з 13 на 14 студзеня правядзе вялікі навагодні баль, паведамілі БЕЛТА арганізатары.
Для таго каб трапіць на баль, зусім неабавязкова ехаць у Вену. Сёмы раз запар Вялікі тэатр адкрывае свае дзверы на стары Новы год - у ноч з 13 на 14 студзеня - усім, хто любіць высакародныя забавы.
"Вялікі баль у Вялікім - гэта шорах сукенак, вясёлы смех, звон бакалаў, забаўныя розыгрышы, цудоўная музыка і самыя розныя танцы - ад вальса да паланэза. Але самае галоўнае - 13 студзеня з'явіцца магчымасць убачыць артыстаў і музыкантаў, якія пастараюцца зрабіць гэты вечар па-сапраўднаму чароўным", - запэўнілі арганізатары.
Буйны культурны праект ужо стаў традыцыяй, і многія гараджане нават не ўяўляюць першы месяц года без грандыёзнага мерапрыемства, куды прыязджаюць дамы ў раскошных вячэрніх сукенках і пышных спадніцах, а мужчыны - у элегантных касцюмах, смокінгах і фраках. Бадай, гэта адзіная ноч у годзе, калі дзяўчына можа адчуць сябе сапраўднай Золушкай. Толькі вось апоўначы зусім не трэба бегчы дадому - наадварот, якраз у гэты час чараўніцтва толькі пачынаецца.
Сёлетні навагодні баль пройдзе пад знакам Старажытнай Грэцыі: гасцей будуць вітаць чароўныя музы і залатакудры Апалон, бог святла і апякун мастацтваў.
версія для друку
зрабіць стартавай
дабавіць у выбранае