Падзеі, факты, анонсы
Уся гісторыя УНС - у фота. Выстава БЕЛТА пра беларускае народаўладдзе адкрылася ў Палацы Рэспублікі
18 снежня, Мінск /Кар. БЕЛТА/. Выстава БЕЛТА "УНС: гісторыя беларускага народаўладдзя" адкрылася ў Палацы Рэспублікі, перадае карэспандэнт БЕЛТА.
Асаблівасць выставы ў тым, што яна спалучае тэксты і выявы, каб наглядна расказаць пра ключавыя этапы станаўлення і функцыянавання УНС, яго ролю ў фарміраванні беларускай дзяржаўнасці і прыняцці стратэгічных рашэнняў, расказала намеснік галоўнага рэдактара - начальнік аддзела спецыяльных праектаў рэдакцыі візуальнай інфармацыі БЕЛТА Наталля Козіч.
"Фатографы БЕЛТА працавалі на ўсіх пасяджэннях УНС, пачынаючы з першага, якое адбылося 30 гадоў таму, працуюць яны і на сённяшнім. Агенцтва мае ўнікальны архіў фота. Дзякуючы гэтаму мы можам прасачыць, як развіваўся сход, як раслі яго маштабы, як ён дапаўняецца выставамі, канцэртамі. УНС стаў справай дзяржаўнай важнасці, атрымаў канстытуцыйны статус і цяпер з'яўляецца вышэйшым органам народаўладдзя, чые рашэнні абавязковыя для выканання і маюць юрыдычную сілу, - звярнула ўвагу яна. - Адпаведна мяняюцца яго пасылы: "Толькі народ мае права вырашаць свой лёс", "За моцную і квітнеючую Беларусь!", "Адзінства! Развіццё! Незалежнасць!", "Час выбраў нас!".
Праз фота, прадстаўленыя на выставе, можна прасачыць прыняцце ўсіх ключавых дакументаў на Усебеларускім народным сходзе, адзначыла Наталля Козіч.
Усяго на выставе прадстаўлена больш за 100 фатаграфій, і гэта не толькі само пасяджэнне і Прэзідыум. "Паколькі гэтым падзея не абмяжоўваецца. Гэта перш за ўсё ўзаемадзеянне дэлегатаў, як усёй грамадой іх адпраўляюць, сустракаюць, як упрыгожаны Мінск. На фота паказаны дэлегаты - знакавыя фігуры свайго часу, а таксама замежныя госці УНС. Акрамя здымкаў з самога мерапрыемства, на выставе прадстаўлена атрыбутыка сходу: некаторыя друкаваныя выданні, якія асвятляюць дзейнасць і рашэнні УНС. Можна ўбачыць нават напаўненне партфеля дэлегата: ручкі, блакноты, а таксама нагрудны знак дэлегата УНС", - расказала пра экспазіцыю намеснік галоўнага рэдактара - начальнік аддзела спецыяльных праектаў.
Заслужаны дзеяч культуры Рэспублікі Беларусь карэспандэнт БЕЛТА Аліна Грышкевіч з 2001 года, гэта значыць практычна на працягу 25 гадоў, удзельнічае ў асвятленні УНС. "Фармат мяняецца, час мяняецца: у 2001-м была адна праблематыка, адны тэмы, цяпер - іншыя. Але гэта заўсёды сапраўднае свята: хваляванне, чаканне ключавых заяў Прэзідэнта і вялікая адказнасць перад краінай", - прызналася яна.
Аліна Грышкевіч падкрэсліла, што краіна за гэты час прайшла вялікі шлях і дзякуючы УНС можна прасачыць, як дынамічна развіваецца Беларусь. "Дасягненні вельмі вялікія. Асабліва прыкметна міжнароднае ўзаемадзеянне па многіх напрамках. Як намеснік старшыні таварыства дружбы "Беларусь - Кітай" хачу звярнуць увагу на актыўную дынаміку ўсепагоднага і ўсебаковага стратэгічнага партнёрства з Кітайскай Народнай Рэспублікай. Безумоўна, Беларусь за гэты перыяд у свеце стала добра вядомая, беларускія тавары ператварыліся ў сапраўдны брэнд", - падкрэсліла яна.
Фатаграфіі БЕЛТА выдатна адлюстроўваюць гісторыю, дадаў старшыня Дзятлаўскага райвыканкама Андрэй Садоўскі. "Калі падзеі занатаваны ў кадры, яны заўсёды выклікаюць жывыя ўспаміны. Таму я з задавальненнем паглядзеў усю выставу", - падзяліўся ўражаннямі ён.
На Усебеларускіх народных сходах як дэлегат ён прысутнічае толькі з 2016 года. "Самым запамінальным для мяне стаў сход у красавіку 2024 года, калі абмяркоўвалася Ваенная дактрына, - расказаў ён. - Ад бягучага УНС чакаю шмат чаго. Сённяшні дзень асабліва цікавы: у пасланні Прэзідэнта прагучаць асноўныя пасылы развіцця, пытанні рэгіёнаў і дэмаграфіі. Упэўнены, закрануць і агульнапалітычную сітуацыю вакол Беларусі."
Вядучы спецыяліст інспекцыі па справах непаўналетніх аддзела ўнутраных спраў Краснапольскага райвыканкама Святлана Козік таксама расказала нам, што выстава выклікае гонар за нашу краіну, за яе багацце, за тое, чым мы можам ганарыцца не толькі ўнутры, але і за яе межамі. "Ва ўсіх сферах мы, я думаю, на вышыні", - упэўнена яна. Паводле яе слоў, УНС - ключавая палітычная падзея, якая заўсёды выклікае асаблівае хваляванне. "УНС збірае ўсіх грамадзян, каб вырашаць важныя пытанні, якія вызначаюць нашу сучаснасць і будучыню. Спадзяюся, сход стане пляцоўкай для канструктыўнага абмену думкамі і ідэямі, дзе кожны голас будзе пачуты. Веру, што сумеснымі намаганнямі мы намецім шляхі далейшага развіцця дзяржавы, і кожны беларус будзе жыць яшчэ лепш, - звярнула ўвагу Святлана Козік. - Такія выставы дапамагаюць маладому пакаленню больш паглыбляцца ў гісторыю УНС. Яны выхоўваюць дзяцей у патрыятычным плане, звязваючы мінулае і будучыню. Я пастаянна працую з дзецьмі і разумею, наколькі гэта важна".
версія для друку
зрабіць стартавай
дабавіць у выбранае