Падзеі, факты, анонсы

Унікальныя знаходкі прадставяць на выстаўцы ў Нацыянальным гістарычным музеі

Фота з архiва

11 лютага, Мінск /Кар. БЕЛТА/. Выставачны праект "Лёс Музея - лёс Краіны. Шлях даўжынёй у стагоддзе" прадставяць 17 лютага ў Нацыянальным гістарычным музеі Рэспублікі Беларусь, паведамілі БЕЛТА ў музеі.

На выстаўцы будуць прадстаўлены разнастайныя музейныя экспанаты - артэфакты з розных гістарычных эпох, сабраныя супрацоўнікамі музея ў 1919-1950 гады. Гэта ўнікальныя знаходкі з першых у краіне археалагічных раскопак, прадметы сялянскага і гарадскога побыту, фатаграфічныя здымкі і замалёўкі з этнаграфічных экспедыцый, творы мастацтва, сабраныя з палацаў і маёнткаў, рукапісы, кнігі і шмат іншага. Кожны музейны экспанат, які будзе прадстаўлены на выстаўцы, захоўвае ў сабе шмат гісторый. Некаторыя музейныя прадметы будуць прадстаўлены наведвальнікам упершыню.

"Выстаўка прыадкрые адну з няпростых, але вельмі цікавых старонак айчыннай гісторыі, якая прысвечана нараджэнню і станаўленню буйнейшага музея краіны - Нацыянальнага гістарычнага музея", - адзначылі ва ўстанове культуры.

Выставачны праект раскажа аб гісторыі стварэння музея, аб збіральніках і захавальніках нацыянальных каштоўнасцей, а таксама аб музейных калекцыях.

Выстаўка створана на аснове даследаванняў навуковых супрацоўнікаў Нацыянальнага гістарычнага музея. Раздзелы экспазіцыі адлюстроўваюць самыя значныя этапы ў яго гісторыі.

У выставачным праекце прымаюць удзел: Нацыянальная бібліятэка Беларусі, Інстытут гісторыі Нацыянальнай акадэміі навук Беларусі, Нацыянальны архіў Рэспублікі Беларусь, Дзяржаўны архіў Мінскай вобласці, Беларускі дзяржаўны музей гісторыі Вялікай Айчыннай вайны.

версія для друку

зрабіць стартавай

дабавіць у выбранае