Падзеі, факты, анонсы
У Гарадку зацвердзілі асноўны сцэнарый Дня пісьменства
27 чэрвеня, Гарадок /Кар. БЕЛТА/. На пасяджэнні Нацыянальнага арганізацыйнага камітэта па падрыхтоўцы да правядзення ХХХ Дня беларускага пісьменства зацвердзілі асноўны сцэнарый свята ў Гарадку. Аб гэтым журналістам паведаміла старшыня Гарадоцкага райвыканкама Ірына Палякова, перадае карэспандэнт БЕЛТА.
"На пасяджэнні арганізацыйнага камітэта зацвярджаецца канва сцэнарыя. Ёсць даволі шырокі пакет прапаноў для ўключэння ў сцэнарый", - растлумачыла яна.
На свяце ў Гарадку на пачатку верасня арганізатары чакаюць тысячы гасцей. Сёння тут рыхтуюць усе лакацыі да правядзення маштабнага фестывалю.
Паводле слоў Ірыны Паляковай, адной з асноўных лакацый стане сквер, дзе пройдзе фестываль "Мара гурмана", свята "Тарас на Парнасе" і традыцыйныя чытанні. Тамсама будзе працаваць пляцоўка з кніжным фестывалем, асобныя пляцоўкі для моладзі, пляцоўка Мінадукацыі з гістарычнай рэканструкцыяй, а таксама інтэрактыўныя пляцоўкі і выстава кнігадрукавання.
Паводле яе слоў, у горадзе цяпер праводзіцца капітальны рамонт пяці жылых дамоў, яшчэ прыкладна на 50 аб'ектах - бягучы. На пяці вуліцах паклалі ўжо асфальт. Работы прадаўжаюцца, праходзіць працэдура закупкі. "Каля Br900 тыс. выдзелена на паляпшэнне вулічна-дарожнай сеткі. Што датычыцца аб'ектаў адукацыі (у нас дзве школы, тры дзіцячыя сады) - рамонтныя работы знаходзяцца на завяршальнай стадыі. Больш за Br2 млн выдзелена толькі на рамонт устаноў адукацыі. Ужо завершаны работы ў дачыненні да Дома рамёстваў, музея, бібліятэкі, гарадскога Дома культуры. Сур'ёзныя работы вядуцца і па нашай цэнтральнай раённай бальніцы: касметычны рамонт, рамонт фасадаў, закуплены перасовачны медыцынскі цэнтр. Асобны блок работы - па турыстычных маршрутах, каб прыцягнуць у наш рэгіён гасцей", - дадала кіраўнік райвыканкама.
Сродкі на падрыхтоўку аб'ектаў у Гарадку да Дня пісьменства накіраваны ў асноўным з абласнога і мясцовага бюджэтаў.
ХХХ Дзень беларускага пісьменства пройдзе ў Гарадку 2 і 3 верасня 2023 года.
версія для друку
зрабіць стартавай
дабавіць у выбранае