Падзеі, факты, анонсы

У Беларусь паступілі 100 тыс. экспрэс-тэстаў на антыцелы да СOVID-19

Эдуард Вальчук

11 мая, Мінск /Кар. БЕЛТА/. У Беларусь паступілі 100 тыс. экспрэс-тэстаў на антыцелы да СOVID-19, паведаміў сёння журналістам галоўны ўрач Рэспубліканскага цэнтра арганізацыі медыцынскага рэагавання Эдуард Вальчук, перадае карэспандэнт БЕЛТА.

"У суботу ў Беларусь з Кітая паступіла партыя тэст-сістэм. Гэта экспрэс-тэсты для вызначэння антыцел у крыві на вірус СOVID-19. Яны набыты за сродкі нашых грамадзян, якія былі накіраваны на дабрачынны рахунак Міністэрства аховы здароўя", - сказаў Эдуард Вальчук.

Усе тэст-сістэмы ўжо размеркаваны па арганізацыях аховы здароўя. "Пачата ўжо адгрузка. Першы груз забрала Брэсцкая вобласць яшчэ ў нядзелю. Апошнія тэсты плануем раздаць ужо сёння. Гэта партыя тэстаў паступае ў арганізацыі аховы здароўя для выяўлення захворвання ў час яго разгару або для дыягностыкі перанесеных лёгкіх форм захворвання", - адзначыў галоўны ўрач.

Эдуард Вальчук падкрэсліў, што экспрэс-тэсты размеркаваны ў адпаведнасці з узроўнем захваральнасці ў абласцях і Мінску. "Яны размяркоўваліся ў адпаведнасці з патрэбнасцю цяпер, каб крыху разгрузіць нашы асноўныя лабараторыі, якія працуюць над дыягностыкай СOVID-19", - дадаў ён.

Як адзначылі ў прэс-службе Міністэрства аховы здароўя, размеркаваны экспрэс-тэсты ў наступным парадку: Мінск - 20 тыс. штук, Віцебская і Брэсцкая вобласці - па 11 тыс., Гомельская, Гродзенская, Магілёўская вобласці - па 10 тыс. Спецыялісты Мінскай вобласці, якія таксама аднымі з першых атрымалі 13 тыс. экспрэс-тэстаў, ужо сёння развозяць іх па бальніцах. Акрамя таго, установам аховы здароўя, якія ўваходзяць у сістэму Міністэрства аховы здароўя, перададзены 10 тыс. штук.

Плануецца, што выкарыстоўваць экспрэс-тэсты пакуль будуць толькі ўстановы аховы здароўя. На наступным тыдні чакаюцца дадатковыя пастаўкі, пасля чаго ў краіне ўсім жадаючым будзе прадастаўлена магчымасць праходзіць тэсціраванне. Экспрэс-тэсты паказваюць наяўнасць антыцел. У перыяд разгару клінічных сімптомаў яны выяўляюць наяўнасць імунаглабулінаў М, якія сведчаць аб актыўным інфекцыйным працэсе. Калі чалавек перахварэў некаторы час таму, у яго з'яўляюцца імунаглабуліны G. Пры наяўнасці падазрэнняў, звязаных з перанесеным у лёгкай форме захворваннем, можна будзе прайсці тэсціраванне, каб пацвердзіць іх або абвергнуць.

версія для друку

зрабіць стартавай

дабавіць у выбранае