Падзеі, факты, анонсы
У антытэрарыстычнай канферэнцыі АБСЕ ў Мінску прымуць удзел дэлегаты больш як 40 краін
27 верасня, Мінск /Кар. БЕЛТА/. Звыш 160 дэлегатаў з больш як 40 краін прымуць удзел у міжнароднай канферэнцыі высокага ўзроўню "Прадухіленне і барацьба з тэрарызмам у лічбавую эпоху", якая пройдзе ў Мінску 9-10 кастрычніка. Аб гэтым паведаміў сёння журналістам начальнік упраўлення інфармацыі і лічбавай дыпламатыі - прэс-сакратар Міністэрства замежных спраў Анатоль Глаз, перадае карэспандэнт БЕЛТА.
Гэта будуць прадстаўнікі знешнепалітычных ведамстваў, міністры абароны і ўнутраных спраў, спецыяльных службаў, парламентаў і дыпламатычнага корпуса. Чакаецца, што ў канферэнцыі прымуць удзел генеральны сакратар АБСЕ Томас Грэмінгер, кіраўнікі профільных структур ААН, Інтэрпала, Савета Еўропы, СНД, АДКБ і ШАС.
На форуме будуць абмяркоўвацца імплементацыя нарматыўна-прававой базы АБСЕ для барацьбы з тэрарызмам у лічбавую эпоху, значэнне дзяржаўна-прыватнага партнёрства пры барацьбе з тэрарызмам у анлайн-сегменце, абарона важнейшых аб'ектаў інфраструктуры ад тэрарыстычных атак, што ідуць з кіберпрасторы.
версія для друку
зрабіць стартавай
дабавіць у выбранае