Падзеі, факты, анонсы

Спартыўны арбітражны суд прыняў бок Беларускага лыжнага саюза ў справе супраць FIS

Фота НАК Беларусі

2 снежня, Мінск /Кар. БЕЛТА/. Беларускі лыжны саюз выйграў справу супраць Міжнароднай федэрацыі лыжнага спорту і снаўборда (FIS) у Спартыўным арбітражным судзе (CAS), паведамілі БЕЛТА ў прэс-службе НАК.

11 лістапада 2025 года Беларускі лыжны саюз падаў апеляцыю на рашэнне Міжнароднай федэрацыі лыжнага спорту і снаўборда ад 21 кастрычніка адносна нядопуску беларускіх спартсменаў да ўдзелу ў спаборніцтвах FIS і адборы на Алімпійскія гульні 2026 года ў Італіі.

26 лістапада адбыліся слуханні па апеляцыйнай скарзе, 2 снежня CAS вынес рашэнне на карысць Беларускага лыжнага Саюза. "Пастанова Савета FIS ад 21 кастрычніка 2025 года адмяняецца, паколькі яна забараняе выступаць на прызнаных FIS спаборніцтвах беларускім спартсменам, якія задавальняюць крытэрыям Міжнароднага алімпійскага камітэта для ўдзелу ў якасці індывідуальных нейтральных атлетаў на зімовых Алімпійскіх гульнях 2026 года".

Такім чынам, беларускія лыжнікі і фрыстайлісты, якія адпавядаюць крытэрыям МАК у якасці нейтральных спартсменаў, павінны быць дапушчаны FIS для ўдзелу ў кваліфікацыйных спаборніцтвах да Алімпійскіх гульняў 2026 года. Галоўны старт чатырохгоддзя пройдзе ў Мілане і Карціна-д'Ампеца з 6 па 22 лютага.

версія для друку

зрабіць стартавай

дабавіць у выбранае