Падзеі, факты, анонсы

"Славянскі базар у Віцебску - 2020": маштабны опэн-эйр, "Кінаноч", Гран-пры - у Беларусі

9 ліпеня, Віцебск, /Кар. БЕЛТА/. Да XXXV Міжнароднага фестывалю мастацтваў "Славянскі базар у Віцебску" застаецца 7 дзён. БЕЛТА прапануе акунуцца ў рэтраспектыву: штодзённа ў архіўных матэрыялах расказваем пра самыя яркія моманты кожнага фестывалю па гадах. Сёння - пра фестываль 2020 года.

XXIX Міжнародны фестываль мастацтваў "Славянскі базар у Віцебску" прайшоў з 16 па 19 ліпеня, у ім прынялі ўдзел прадстаўнікі 23 краін. Форум адбыўся ў абноўленым фармаце - яго мерапрыемствы былі арганізаваны на адкрытых пляцоўках, пляцоўку Летняга амфітэатра аснасцілі самым сучасным асвятляльным абсталяваннем, якое выкарыстоўваецца пры стварэнні шоу такіх маштабаў. Упершыню манціравалася шматузроўневая святлодыёдная падлога высокага распазнавання з прыступкамі.

Цырымонія ўрачыстага ўзняцця сцяга фестывалю адбылася традыцыйна на пляцоўцы каля Летняга амфітэатра. У 2020 годзе сюды выехалі 29 аўтамабіляў - па колькасці фестывальных гадоў.

На гала-канцэрце ўрачыстага адкрыцця, які прайшоў пад дэвізам "Я люблю цябе, жыццё!", да гледачоў звярнуўся Аляксандр Лукашэнка. Паводле слоў кіраўніка дзяржавы, "Славянскі базар" стаў сэрцам культурнага і духоўнага адзінства. "Што б ні абдывалася ў свеце, міжнародны фестываль "Славянскі базар" заўсёды разбураў бар'еры і ўмацоўваў дружбу народаў", - заявіў Аляксандр Лукашэнка.

Спецыяльнай узнагароды Прэзідэнта Рэспублікі Беларусь "Праз мастацтва - да міру і ўзаемаразумення" быў удастоены народны артыст Расіі Філіп Кіркораў. На сцэну фестывалю ён упершыню выйшаў у 1994 годзе і даў за гэтыя гады на "Славянскім базары" 6 сольных канцэртаў.

На фестывальным вечары "Саюзная дзяржава запрашае..." адбыўся двухгадзінны канцэрт "Жывая музыка кіно" аркестра "Фанограф-Сімфа-Джаз" пад кіраўніцтвам Сяргея Жыліна, дзе выступілі расійскія і беларускія артысты, зоркі кіно, тэатра і эстрады.

Запомніўся жыхарам Віцебска і яго гасцям трохгадзінны канцэрт "Беларусь збірае сяброў", які аб'яднаў першы тур XXIX Міжнароднага конкурсу выканаўцаў эстраднай песні "Віцебск-2020", выступленне артыстаў з розных краін, пераможцаў і лаўрэатаў песенных конкурсаў мінулых гадоў.

XXIX Міжнародны конкурс выканаўцаў эстраднай песні "Віцебск-2020" сабраў прадстаўнікоў 14 краін. Афіцыйнае прадстаўленне і першая частка конкурсу - тур "Славянскі хіт" адбыліся ў рамках вечара ў Летнім амфітэатры ў суправаджэнні Прэзідэнцкага аркестра Рэспублікі Беларусь пад кіраўніцтвам Віталя Кульбакова. Другі тур конкурснай праграмы быў праведзены ў час гала-канцэрта ўрачыстага закрыцця фестывалю. Канкурсанты выканалі сусветны хіт у суправаджэнні фанаграмы "-1" і шоу-балета "Todes". Старшынёй журы быў кампазітар, спявак, прадзюсар, народны артыст Расіі Алег Газманаў. Гран-пры заваяваў прадстаўнік Беларусі.

Конкурсная праграма ХVIII Міжнароднага дзіцячага музычнага конкурсу "Віцебск-2020" адбылася на пляцоўцы каля канцэртнай залы "Віцебск", дзе была ўстаноўлена сучасная сцэна са святлодыёднымі экранамі, сцэнаграфічнымі канструкцыямі. Свае вакальныя даныя паказалі юныя выканаўцы з 17 краін. Іх ацэньвала журы на чале з заслужаным артыстам Беларусі Аляксандрам Саладухам. Галоўны прыз таксама дастаўся прадстаўніку Беларусі.

У 2020 годзе на "Славянскім базары" ўпершыню адбылася прэзентацыя беларускага праекта #PROMOFEST "TOP ARTIST", які аб'яднаў перспектыўных маладых артыстаў. Многія з іх прадстаўлялі Беларусь на міжнародных вакальных конкурсах, у музычных праектах і тэлешоу.

Кінапраграма фестывалю была арганізавана сумесна з Нацыянальнай кінастудыяй "Беларусьфільм" і называлася "Кінаноч". У праект, прысвечаны 75-годдзю Перамогі, увайшлі два ваенныя фільмы. Першым на пляцоўцы каля канцэртнай залы "Віцебск" быў паказаны кінаальманах "Вайна. Застацца чалавекам", які складаецца з чатырох драматычных гісторый аб Вялікай Айчыннай вайне, знятых маладымі кінематографамі. Другім кінасеансам стаў паказ мастацкага фільма "Брэсцкая крэпасць".

У рамках форуму шосты раз адбыўся фэст вулічнага мастацтва "На сямі вятрах", дзе ўдзельнічалі 70 калектываў з Беларусі: тэатры масак, перформеры, рок-музыканты, паэты, фатографы, дыджэі, фаершчыкі, дзіцячыя і дарослыя танцавальныя калектывы.

У 2020 годзе на фестывалі прайшоў фінал ІІ танцавальнага праекта "Dream Dance Fest". Свае харэаграфічныя здольнасці прадэманстравалі танцоры з Беларусі і студэнты беларускіх ВНУ з Туркменіі і Кітая.

На плошчы Перамогі ў Дзень моладзі на форуме стартаваў рэспубліканскі маладзёжны праект "Поезд #Беларусь. Моладзь. Натхненне", у якім прынялі ўдзел каля 100 таленавітых навучэнцаў, маладых вучоных і спартсменаў, удзельнікаў студатрадаўскага руху, валанцёраў і блогераў. На працягу сямі дзён на стылізаваным сімволікай праекта чыгуначным саставе яны праехалі па маршруце: Віцебск - Шклоў - Магілёў - Гомель - Пінск - Брэст - Гродна - Маладзечна - Мінск. У гарадах яны азнаёміліся са знакавымі аб'ектамі, створанымі ў эпоху незалежнай Беларусі, аддалі даніну памяці загінулым і жывым героям Вялікай Айчыннай вайны.

Кірмаш рамёстваў "Горад майстроў" на фестывалі атрымаў прапіску на вуліцах Талстога і Пушкіна. Тут жа прайшоў конкурс майстроў традыцыйнага і сучаснага мастацкага жывапісу "Фарбы нябёсаў", адбылося знаёмства з удзельнікамі пленэру майстроў народных мастацкіх рамёстваў па дэкаратыўным жывапісе "Райскі сад - 2020".

Ва ўнутраным дворыку абласнога краязнаўчага музея арганізатары прадставілі праект "Лялечны дворык" з паказам спектакляў.

На плошчы Свабоды на форуме сёмы раз прайшоў адкрыты турнір нацыянальных танцаў і абласны конкурс народнай музыкі і прыпеўкі "А музыкі граюць, граюць…".

Асноўныя мерапрыемствы XXXV Міжнароднага фестывалю мастацтваў "Славянскі базар у Віцебску" пройдуць з 16 па 19 ліпеня, а першыя канцэрты адбудуцца ўжо 14 ліпеня.