Падзеі, факты, анонсы

Штангістка Бондарава заваявала серабро маладзёжнага чэмпіянату Еўропы

Фота з архiва

4 лістапада, Мінск /Кар. БЕЛТА/. Беларуска Алена Бондарава заняла другое месца на чэмпіянаце Еўропы па цяжкай атлетыцы сярод юніёраў і моладзі ў албанскім Дурэсе, паведамляе карэспандэнт БЕЛТА.

Наша спартсменка стала прызёрам у катэгорыі звыш 86 кілаграмаў сярод дзяўчат не старэйшых за 23 гады. У рыўку Бондарава паслядоўна ўзяла штангу грузам 105, 108 і 110 кг, заваяваўшы малое золата ў гэтым практыкаванні. У штуршку Алене ўдаліся спробы на 125 і 130 кг, але падыход на 135 кг аказаўся няўдачным. З гэтай вагой справілася грузінка Натыя Гадэлія, якая дзякуючы гэтаму на адзін кілаграм абышла беларуску ў дваябор'і (241 супраць 240). У Бондаравай - серабро, тройку замкнула немка Кіяра Клуг (235 кг).

Раней перамогі на кантынентальным форуме ў Албаніі атрымалі нашы Дзіяна Майсяевіч і Андрэй Фралоў, а Дар'я Хейдэр, Ягор Папоў і Ігнацій Паўлюкавец заваявалі сярэбраныя ўзнагароды ў дваябор'і. Апошнімі з беларусаў на памост у Дурэсе выйдуць Сяргей Шаранкоў і Уладзіслаў Саковіч, якія выступяць у катэгорыі да 110 кілаграмаў сярод моладзі не старэйшай за 23 гады.

версія для друку

зрабіць стартавай

дабавіць у выбранае