Падзеі, факты, анонсы

Штангіст Рагажынскі стаў бронзавым прызёрам юніёрскага чэмпіянату Еўропы ў рыўку

Фота з архiва

4 лістапада, Мінск /Кар. БЕЛТА/. Беларускі штангіст Арцём Рагажынскі стаў прызёрам чэмпіянату Еўропы па цяжкай атлетыцы сярод юніёраў і моладзі, які праходзіць у албанскім Дурэсе, паведамляе карэспандэнт БЕЛТА.

Беларус выступіў у турніры ў катэгорыі звыш 110 кілаграм сярод юніёраў не старэйшых за 20 гадоў. У рыўку Рагажынскі стартаваў з паспяховай спробы на 160 кг, потым не справіўся з вагой 165 кг, але ў трэцім падыходзе ўзяў на кілаграм больш. Рэзультат 166 кг прынёс Арцёму малы бронзавы медаль у гэтым практыкаванні.

У штуршку наш штангіст падняў 200 кг, але агульнай сумы 366 кг не хапіла да п'едэстала ў дваябор'і: Рагажынскі стаў чацвёртым усяго за тры кілаграмы ад тройкі. Перамогу ў гэтай катэгорыі атрымаў расіянін Георгій Мянд (386 кг).

За дзень да заканчэння спаборніцтваў у актыве беларускай каманды 17 медалёў кантынентальнага форуму (5-7-5). Раней прызёрамі сталі Дзіяна Майсяевіч, Андрэй Фралоў (абодва - 2 залатыя ўзнагароды і 1 бронзавая), Ягор Папоў (1 залатая ўзнагарода, 2 сярэбраныя), Дар'я Хейдэр (3 сярэбраныя ўзнагароды), Ігнацій Паўлюкавец (2 сярэбраныя ўзнагароды, 1 бронзавая) і Артур Якушаў (бронзавая ўзнагарода).

4 лістапада ўдзел у турніры прымуць нашы Алена Бондарава, Сяргей Шаранкоў і Уладзіслаў Саковіч. Усяго чэмпіянат Еўропы па цяжкай атлетыцы сярод юніёраў і моладзі сабраў у Албаніі больш за 400 штангістаў з 42 краін.

версія для друку

зрабіць стартавай

дабавіць у выбранае