Падзеі, факты, анонсы

"Шлях да колеру" - выстава сляпых мастакоў адкрылася ў Мінску

23 снежня, Мінск /Кар. БЕЛТА/. Выстава работ сляпых мастакоў "Шлях да колеру" адкрылася 22 снежня ў галерэі "Арт-Беларусь" у Палацы мастацтваў, паведамілі БЕЛТА арганізатары.

На выставе прадстаўлена 55 работ. Іх аўтары - навучэнцы мастацкага гуртка Belonika.аrt, а таксама іх выкладчык Сяргей Бандаровіч. "З дапамогай устройства распазнавання колеру і асаблівых прыёмаў, якія даюць магчымасць наносіць аб'ёмныя контуры, сляпыя мастакі ствараюць цудоўныя творы. Асаблівае разуменне колеру і формы робіць іх творчасць непаўторнай, адкрывае гледачу новае ўспрыманне прывычных з дзяцінства паняццяў", - адзначылі арганізатары. Частка выручаных сродкаў пойдзе дабрачыннаму фонду "Ласкавыя крылы" на развіццё праекта і дапамогу ў арганізацыі студыі малявання для сляпых людзей, частка - сляпым мастакам. У час работы выставы пройдуць сустрэчы з аўтарамі праекта, майстар-класы.

Экспазіцыя з'яўляецца часткай праграмы Belonica.art, якую рэалізуе дабрачынны фонд "Ласкавыя крылы" сумесна з цэнтрам выяўленчага і медыя мастацтва "Новая культурная ініцыятыва" і анлайн-платформай па продажы мастацтва artcenter.by.

Праект Belonica.art ставіць перад сабой мэту не толькі навучыць сляпых маляваць, але і даць ім магчымасць у будучым зарабляць любімай справай, стварыць арт-прастору для сустрэч і творчасці людзей з парушэннямі зроку, а таксама зрабіць устройства "Ліхтар" даступным для выкарыстання ўсімі, хто мае патрэбу. Гэта ўстройства дае магчымасць счытваць колеры і пераводзіць у адпаведныя гукі. За аснову бяруць 12 колераў (тоны і паўтоны), кожнаму колеру адпавядае пэўны гук.

версія для друку

зрабіць стартавай

дабавіць у выбранае