Падзеі, факты, анонсы

Шкурдай прынесла Беларусі першае золата дамашняга Кубка мацнейшых

20 лістапада, Мінск /Кар. БЕЛТА/. Настасся Шкурдай прынесла беларускай камандзе першае золата міжнароднага турніру па плаванні на кароткай вадзе "Кубак мацнейшых спартсменаў" у Мінску, паведамляе карэспандэнт БЕЛТА.

У стартавы дзень турніру Шкурдай спаборнічала на дыстанцыі 200 м комплексным плаваннем. У фінале брастаўчанка паказала рэзультат 2 мін. 08,11 сек. і атрымала перамогу, на секунду апярэдзіўшы расіянку Яну Шакіраву. Тройку прызёраў замкнула яшчэ адна прадстаўніца Расіі Ірына Звягінцава.

"Знакавы момант для мяне, атрымалася адкрыць залаты медальны залік для нашай краіны. Прыемна бачыць столькі балельшчыкаў на трыбунах і адчуваць іх падтрымку. Даўно не чула такога менавіта дома, гэта матывуе на самыя хуткія секунды", - адзначыла Шкурдай.

Першы асабісты камплект узнагарод Кубка мацнейшых быў разыграны на дыстанцыі 1500 м вольным стылем. Другое месца ў фінале заняла наша Алеся Акінчыц, следам за ёю размясцілася яе суайчынніца Ксенія Мастовіч. Лепшы час паказала расіянка Арына Панціна.

"Серабро - гэта добра, але сваім вынікам я не вельмі задаволена. Канкурэнцыя нядрэнная, па суседняй дарожцы была вельмі моцная спартсменка з Расіі. Добра, калі ёсць за кім плыць, - сказала Акінчыц. - Дамашнія спаборніцтвы вельмі важныя, а турнір такога маштабу - асабліва".

Усяго Кубак мацнейшых спартсменаў па плаванні на кароткай вадзе сабраў у сталіцы каля 500 атлетаў з 11 краін. Сярод удзельнікаў - чэмпіёны свету і Еўропы і фіналісты Алімпійскіх гульняў. Спаборніцтвы прадоўжацца па 23 лістапада, у праграме турніру 46 фіналаў.

версія для друку

зрабіць стартавай

дабавіць у выбранае