Падзеі, факты, анонсы

Святочныя мерапрыемствы пачнуцца напярэдадні 71-й гадавіны Вялікай Перамогі, але галоўным днём святкавання стане 9 мая, сказала Ірына Дрыга. Паводле яе слоў, раніцай на праспекце Незалежнасці, на прылеглых да яго вуліцах, на плошчы Перамогі ўпершыню пройдзе шэсце памяці "Беларусь памятае" з удзелам грамадскасці горада Мінска, прадстаўнікоў маладзёжных арганізацый, прадстаўнікоў дзіцячых арганізацый, грамадскіх аб'яднанняў. Яны пройдуць да плошчы Перамогі, несучы ў руках партрэты герояў вайны, сваіх сваякоў як сведчанне памяці аб вайне і ўсенароднай удзячнасці пакаленню пераможцаў. Для ветэранаў на плошчы Перамогі будуць устаноўлены трыбуны, дзе яны сустрэнуць шэсце.

Потым да помніка на плошчы Перамогі будуць ускладзены кветкі, прагучыць вальс Перамогі. А вечарам на пляцоўцы перад Вечным агнём адбудзецца святочны канцэрт Прэзідэнцкага аркестра Рэспублікі Беларусь з удзелам беларускіх выканаўцаў і запрошаных артыстаў.

Святочныя мерапрыемствы з нагоды Дня Перамогі пачнуцца 6 мая з урачыстага сходу і канцэрта майстроў мастацтва "Па праву памяці жывой", якія пройдуць у Палацы Рэспублікі. Паводле слоў Ірыны Дрыга, гэта традыцыйнае мерапрыемства, якое кожны год Міністэрства культуры Беларусі рыхтуе так, каб канцэртная праграма была цікавай і ветэранам і моладзі, каб усе маглі адчуць дух свята. У гэтым годзе падрыхтаваны не проста канцэрт, а канцэрт-спектакль, маштабны музычны тэатралізаваны паказ са скразным сюжэтам, героямі, якія, звяртаючыся да сваіх нашчадкаў, правядуць гледачоў праз свае ўспаміны і прывядуць да сённяшняга дня. Як адзначыла першы намеснік міністра культуры, у музычным паказе будуць гучаць вершы і песні часоў Вялікай Айчыннай вайны, пасляваеннага часу.

Упершыню на гэтым канцэрце песня вядомага беларускага кампазітара Васіля Раінчыка "Кветкі Вялікай Перамогі" прагучыць у магутным харавым выкананні. У канцэрце заняты лепшыя творчыя калектывы, беларускія выканаўцы, артысты драматычных тэатраў, творчыя калектывы Міністэрства абароны.

Удзельнікам святкавання будзе ўручацца сімвал акцыі "Кветкі Вялікай Перамогі".

Адной з цікавых падзей, якая адбудзецца 7 мая, стане канцэрт народнага артыста СССР Іосіфа Кабзона і лаўрэатаў конкурсу "Хрустальныя зорачкі". Канцэрт пройдзе ў 16.00 на пляцоўцы каля Палаца спорту.

На гэтай жа пляцоўцы 8 мая праводзяцца мерапрыемствы рэспубліканскай акцыі "Кветкі Вялікай Перамогі". Тут разгорнецца інтэрактыўная экспазіцыя "Кветкі Вялікай Перамогі" з тэматычнымі пляцоўкамі, прэзентацыямі, перасовачныя музейныя экспазіцыі, а таксама пройдзе "Бітва дыджэяў" з удзельнікамі з усіх рэгіёнаў Беларусі.

Святочны салют 9 Мая з 30 залпаў расквеціць неба ў Мінску і абласных гарадах