Падзеі, факты, анонсы

18 снежня, Мінск /Кар. БЕЛТА/. Сёння ў славенскай Паклюцы жаночай спрынтарскай гонкай прадоўжыцца трэці этап Кубка свету па біятлоне. У ёй прымуць удзел шэсць прадстаўніц Беларусі, паведамляе карэспандэнт БЕЛТА.

Першай з беларускіх біятланістак на дыстанцыю працягласцю 7,5 км з двума агнявымі рубяжамі адправіцца Ірына Крыўко, у якой 16-ы стартавы нумар. У Надзеі Скардзіна 22-я пазіцыя, Надзея Пісарава стартуе 44-й, адразу ўслед за ёй на лыжню выйдзе Ганна Сола, у Дар'і Юркевіч 76-ы нумар, Настасся Дубарэзава пойдзе на трасу 97-й сярод 105 удзельніц спрынту. У адсутнасць лідара беларускай каманды трохразовай алімпійскай чэмпіёнкі і пераможцы мінулага Кубка свету Дар'і Домрачавай, лепшай цяпер з'яўляецца бронзавы прызёр сочынскай Алімпіяды-2014 Надзея Скардзіна, якая пасля двух стартавых этапаў займае 15-е месца ў агульным заліку, маючы ў сваім актыве 103 ачкі. У гэтым сезоне яна ўжо двойчы выступала ў спрынтарскіх гонках, праўда, без асаблівага поспеху - у шведскім Эстэрсундзе заняла 56-е месца, а ў аўстрыйскім Хохфільцэне была 22-й. Лепшым вынікам Надзеі Скардзіна ў новым сезоне пакуль з'яўляецца 6-е месца ў індывідуальнай гонцы 15 км у Эстэрсундзе.

Лідар гэтага сезона чэшская біятланістка Габрыэла Соўкалава (222 ачкі) сёння стартуе пад 15-м нумарам, немка Францыска Хільдэбранд (206), якая займае другую пазіцыю, пойдзе на дыстанцыю 20-й, а францужанка Мары Дарэн Абер (195), якая ідзе трэцяй, атрымала 35-ы нумар. Сённяшняя прамая трансляцыя з Паклюкі пачнецца ў 16.20 на тэлеканале "Беларусь 5".

Трэці этап Кубка свету прадоўжыцца да 20 снежня. Акрамя сённяшняга жаночага спрынту ў яго праграме яшчэ 4 старты:

19 декабря

Мужчынская гонка праследавання 12,5 км

Жаночая гонка праследавання 10 км

20 снежня

Мужчынскі мас-старт 15 км

Жаночы мас-старт 12,5 км.-0-