Падзеі, факты, анонсы

Сем чалавек у пяці відах спорту. Графік выступлення беларусаў на Алімпіядзе-2026

Фота Global Look Press

3 лютага, Мінск /Кар. БЕЛТА/. Беларускія спартсмены ў суботу, 7 лютага, пачынаюць выступленні на зімовых Алімпійскіх гульнях 2026 года ў італьянскіх Мілане і Карціна-д'Ампеца, паведамляе карэспандэнт БЕЛТА.

Удзел у галоўным старце чатырохгоддзя ў нейтральным статусе прымуць сем беларускіх спартсменак. Першыя камплекты ўзнагарод будуць разыграны 7 лютага - у гэты дзень лыжніца Ганна Каралёва выйдзе на старт скіятлона 10+10 км (пачатак - у 15.00 па мінскім часе), а канькабежка Марына Зуева выступіць на дыстанцыі 3000 м (18.00).

Раніцай 10 лютага Каралёва паспрачаецца за траплянне ў чвэрцьфінал у класічным спрынце (11.15), а 12 лютага Ганну чакае раздзельная гонка каньковым стылем на 10 км (15.00). Таксама ў чацвер Марына Зуева прабяжыць 5 км на канькабежным авале (18.30).

Спаборніцтвы ў жаночым адзіночным фігурным катанні пройдуць на апошнім тыдні Алімпіяды. 17 лютага беларуска Вікторыя Сафонава прадэманструе кароткую праграму (20.45), а 19 лютага выступіць з адвольнай (21.00).

Заезды ў слаламе ў дзяўчат з удзелам нашай гарналыжніцы Марыі Шканавай адбудуцца 18 лютага (12.00).

Найбольшае беларускае прадстаўніцтва заяўлена ў спаборніцтвах па лыжнай акрабатыцы. За медалі Гульняў будуць змагацца Ганна Гуськова, Ганна Дзяруга і Настасся Андрыянава. Кваліфікацыя фрыстайлістак запланавана на 17 лютага (12.45), фінал - на наступны дзень (15.30). Усяго ўдзельнікі Алімпіяды ў Італіі разыграюць 116 камплектаў узнагарод.

версія для друку

зрабіць стартавай

дабавіць у выбранае