Падзеі, факты, анонсы

Помнік Змітраку Бядулю адкрылі на Усходніх могілках у Мінску

3 лістапада, Мінск /Кар. БЕЛТА/. Помнік вядомаму беларускаму паэту, празаіку і мовазнаўцу Змітраку Бядулю адкрылі на Усходніх могілках у Мінску, перадае карэспандэнт БЕЛТА.

Вядомы беларускі паэт памёр у 1941 годзе ў эвакуацыі каля горада Уральска (Казахстан), дзе быў пахаваны на гарадскіх могілках. Але ў 2020 годзе прах Змітрака Бядулі вярнулі на радзіму і перапахавалі на Усходніх могілках.

У той жа год Дзяржаўны музей гісторыі беларускай літаратуры пачаў збор сродкаў на помнік і аб'явіў конкурс сярод беларускіх скульптараў, па выніках якога перамог праект помніка скульптара Сяргея Гумілеўскага.

Сам ён таксама наведаў урачыстае адкрыццё і адзначыў, што ў аснову помніка пакладзены вобраз нівы, якая калыхаецца пад парывам ветру. "Сам помнік выкананы ў ломаных формах, яго падмурак сімвалізуе тыя шляхі, якія прайшлі паэты той эпохі. У цэлым, ён адлюстроўвае шлях нашага класіка", - расказаў скульптар.

Госцем адкрыцця стаў і сын Змітрака Бядулі Яфім Плаўнік. Ён падкрэсліў, што помнік зроблены па ўсіх канонах. "Ён такі, які павінен стаяць на могілках. Без усялякіх празмернасцей. Ён сціплы і ў той жа час велічны", - падзяліўся ўражаннямі ён.

Як расказала намеснік дырэктара па навуковай рабоце Дзяржаўнага музея гісторыі беларускай літаратуры Алеся Кузняцова, камісія конкурсу доўга вызначала, якім жа павінен быць помнік вядомаму паэту. Для натхнення ўдзельнікам конкурсу прадастаўлялі матэрыялы музея, паказвалі розныя фота.

"Змітрок Бядуля - адзін з найбольш вядомых беларускіх прадстаўнікоў ХХ стагоддзя. Ён мала пражыў, але ён з тых, хто прымаў удзел у развіцці беларускай літаратуры, друкаваўся ў першых беларускіх газетах. Гэтыя факты вельмі важна ведаць. І тыя, хто сёння прачытае аб устаноўленым помніку, магчыма, захоча перачытаць што-небудзь з яго твораў", - падзялілася Алеся Кузняцова.

версія для друку

зрабіць стартавай

дабавіць у выбранае