Падзеі, факты, анонсы
Погляд на мастацтва Беларусі і Італіі першай палавіны ХХ стагоддзя прадставіць выстава ў Мінску
23 мая, Мінск /Кар. БЕЛТА/. Погляд на мастацтва Беларусі і Італіі першай палавіны ХХ стагоддзя прадставіць выстава ў Нацыянальным мастацкім музеі Беларусі, паведамілі БЕЛТА ў музеі.
Выстава "Даторы, Шагал, Суцін, Хадасевіч-Лежэ. Энергія, экспрэсія, сімволіка і сны. Погляд на мастацтва Італіі і Беларусі першай палавіны XX стагоддзя" - ключавая падзея культурнай праграмы пасольства Італіі ў Мінску ў Год італьянскай культуры ў Беларусі, прымеркаваны да 25-годдзя дыпламатычных адносін паміж краінамі.
Выбар пасольства прыпаў на Джэрарда Даторы. Са збору Музея-палаца Палацца дэла Пена ў Перуджы і прыватных калекцый адабралі аўтарытэтныя работы мастака-футурыста ў памяць аб 40-гадовай гадавіне з дня яго смерці. Ідэя заключалася ў тым, каб стварыць дыялог паміж прадстаўніком італьянскага авангарднага руху, заснаванага Філіпа Тамаза Марынеці і распаўсюджанага ва Усходняй Еўропе, уключаючы Расію, і трыма майстрамі мастацтва пачатку ХХ стагоддзя - выхадцамі з Беларусі.
Наведвальнікі Нацыянальнага мастацкага музея змогуць убачыць карціны Даторы нараўне з паэтычнымі вобразамі Марка Шагала, экспрэсіянісцкімі работамі Хаіма Суціна і абстракцыямі Надзеі Хадасевіч-Лежэ. Джэрарда Даторы будзе прадстаўлены 14 творамі канца XIX - пачатку XX стагоддзя, сярод якіх жывапісныя палотны, малюнкі алоўкамі ў аўтарскай тэхніцы і графіка. З карпаратыўнай калекцыі Белгазпрамбанка на выставу прывязуць дзве работы Марка Шагала і дзве - Хаіма Суціна: характэрныя для шагалаўскага стылю "Закаханыя" і "Гадзіннік на палаючым небе", знакамітыя суцінскі партрэт "Ева" і пейзаж "Вялікія лугі ў Шартры каля віядука". На выставе таксама будуць прысутнічаць дзве графічныя работы Надзеі Хадасевіч-Лежэ са збору Нацыянальнага мастацкага музея. Куратары з беларускага боку - Вольга Клёцкіна з Нацыянальнага мастацкага музея і Аляксандр Зіменка з Белгазпрамбанка - пры падрыхтоўцы мерапрыемства цесна супрацоўнічалі з пасольствам Італіі ў Мінску.
Вынікам карпатлівай работы стаў арыгінальны квартэт абсалютна розных мастакоў. Пры гэтым Даторы, Суцін і Хадасевіч-Лежэ блізкія ў імкненні знайсці аўтарскі стыль і адкрыць штосьці новае ў мастацтве. У той час як Даторы і Шагал імкнуцца да перадачы паэзіі сноў у сваіх творах. Талент кожнага з іх раскрыўся не толькі на радзіме, але і ў Францыі. Творчасць беларускіх мастакоў з рысамі нацыянальнага мастацтва развівалася і ў кантэксце еўрапейскага авангарду.
Акрамя жывапісных і графічных твораў на выставе будуць прадстаўлены дакументы, пісьмы, фатаграфіі і часопісы з "Архіваў Даторы". Наведвальнікі змогуць таксама паглядзець дакументальныя фільмы аб жыцці футурыста з Перуджы.
Дзякуючы актыўнай падтрымцы пасла Італіі ў Беларусі Стэфана Б'янкі падзея атрымала патранат Міністэрства культуры і турызму Італіі, Заканадаўчага сходу рэгіёна Умбрыя, Выканаўчага камітэта рэгіёна Умбрыя, Міністэрства культуры Беларусі і Мінскага выканаўчага камітэта. Суарганізатары мерапрыемства - муніцыпалітэт Перуджы, Нацыянальны мастацкі музей, Белгазпрамбанк, пры садзейнічанні "Архіваў Даторы".
Наведаць выставу можна з 31 мая па 4 чэрвеня.
версія для друку
зрабіць стартавай
дабавіць у выбранае