Падзеі, факты, анонсы

Першая партыя вакцыны "Спадарожнік V" паступіць у Беларусь у пачатку 2021 года

Фота з архiва

28 снежня, Мінск /Кар. БЕЛТА/. Першая партыя расійскай вакцыны "Спадарожнік V" паступіць у Беларусь у пачатку 2021 года, расказаў пасол Расіі ў Беларусі Дзмітрый Мезенцаў у праграме "Тыдзень" на тэлеканале СТБ, паведамляе БЕЛТА.

"У хуткім часе, у пачатку 2021 года, першая партыя вакцыны паступіць у Беларусь для вакцынацыі", - сказаў Дзмітрый Мезенцаў.

"Мы ўдзячныя за прафесійную ацэнку, якую далі санітарныя ўрачы Беларусі, ацаніўшы эфектыўнасць і паспяховасць правядзення эксперыментальнага цыкла па апрабацыі вакцыны, які паказаў, што яе можна вырабляць сумесна", - адзначыў пасол.

Дзмітрый Мезенцаў канстатаваў, што гэты год быў вельмі складаным, паколькі пандэмія COVID-19 не была чаканай. Разам з тым ён лічыць, што "гэта яшчэ адна прычына для вызначэння таго, што мы можам рабіць разам у рамках рэальных вытворчасцей".

Як паведамлялася, Міністэрства аховы здароўя Беларусі выдала рэгістрацыйнае пасведчанне на вакцыну "Спадарожнік V". Пасля гэтага яна можа быць дапушчана да рэалізацыі і медыцынскага прымянення на тэрыторыі краіны. Раней Беларусь стала першай краінай, якая прыняла ўдзел у клінічных выпрабаваннях расійскай вакцыны.

версія для друку

зрабіць стартавай

дабавіць у выбранае