Падзеі, факты, анонсы

Да пачатку фестывалю засталося менш за месяц. На гэты момант вядома, што ўдзел у ім прыме шэраг знакамітых спартсменаў, якіх змогуць убачыць беларускія аматары біятлона і госці краіны.

Германія:

Рыка Грос - чатырохразовы алімпійскі чэмпіён, дзевяціразовы чэмпіён свету па біятлоне;

Свен Фішэр - чатырохразовы алімпійскі чэмпіён і сяміразовы чэмпіён свету;

Міхаэль Грайс - трохразовы алімпійскі чэмпіён, трохразовы чэмпіён свету, шматразовы прызёр чэмпіянатаў свету, уладальнік Кубка свету сезона 2006/07;

Сімона Хаўсвальд (Дэнкінгер) - чэмпіёнка свету, шматразовы прызёр чэмпіянатаў свету, уладальніца малога Кубка свету ў спрынце сезона 2009/10.

Нарвегія:

Халвард Ханевальд - трохразовы алімпійскі чэмпіён, пяціразовы чэмпіён свету;

Ларс Бергер - трохразовы чэмпіён свету і сярэбраны прызёр Алімпійскіх гульняў 2010 года ў лыжных гонках, шматразовы прызёр чэмпіянатаў свету па біятлоне, чэмпіён свету па біятлоне 2009 года ў эстафеце;

Ліў-Грэтэ Пуарэ (Шэльбрэйд) - шматразовы прызёр Алімпійскіх гульняў, пераможца агульнага заліку Кубка свету сезона 2003/04, васьміразовая чэмпіёнка свету, першая біятланістка ў гісторыі, якая выйграла чатыры залатыя медалі аднаго чэмпіянату свету (Оберхоф, 2004).

Францыя:

Венсан Дэфран - алімпійскі чэмпіён 2006 года, двухразовы чэмпіён свету, двухразовы бронзавы прызёр Алімпійскіх гульняў у эстафеце.

Швецыя:

Анна Карын Зідэк (Улафсан) - алімпійская чэмпіёнка ў мас-старце;

Хелена Экхальм (Юнсан) - трохразовая чэмпіёнка свету, уладальніца Кубка свету сезона 2008/09.

Аўстрыя:

Крыстаф Зуман - шматразовы прызёр Алімпійскіх гульняў і чэмпіянатаў свету.

Балгарыя:

Кацярына Дафаўска - алімпійская чэмпіёнка і прызёр чэмпіянатаў свету, адзіная чэмпіёнка зімовых Алімпійскіх гульняў у Балгарыі.

Расія:

Юрый Кашкароў - алімпійскі чэмпіён 1984 года, пяціразовы чэмпіён свету;

Ганна Багалій - двухразовая алімпійская чэмпіёнка ў эстафеце;

Надзея Таланава - алімпійская чэмпіёнка ў эстафеце 4х7,5 км (1994), шматразовы прызёр чэмпіянатаў свету.

Беларусь:

Сяргей Булыгін - алімпійскі чэмпіён у эстафеце (1984), шматразовы чэмпіён свету;

Аляксандр Папоў - алімпійскі чэмпіён у эстафеце (1988), сярэбраны прызёр у эстафеце (1992), шматразовы чэмпіён свету, сярэбраны прызёр Кубка свету сезона 1988/89.

Алена Зубрылава - неаднаразовы прызёр чэмпіянатаў свету, чатырохразовая чэмпіёнка свету.

Таксама былі адпраўлены запрашэнні для ўдзелу ў гонцы іншым легендам расійскага і беларускага біятлона: Віктару Майгураву, Яўгену Рэдзькіну, Сяргею Чэпікаву, Сяргею Тарасаву, Валерыю Мядзведцаву, Дзмітрыю Васільеву, Уладзіміру Драчову, Анфісе Разцовай, Святлане Ішмуратавай, Галіне Куклевай. Не выключана, што хтосьці з іх усё ж будзе гатовы наведаць Раўбічы ў якасці ўдзельніка, адзначылі ў Прэзідэнцкім спартыўным клубе.

Зоркі-біятланісты правядуць на раўбічскай трасе дзве гонкі. Спачатку пройдуць спаборніцтвы ў суперспрынце, па выніках якіх удзельнікі сфарміруюць каманды для выступлення ў эстафеце, дзе і будуць разыграны ўзнагароды.

Акрамя спаборніцтваў гоншчыкі прымуць удзел у аўтограф-сесіі, дзе ўсе балельшчыкі змогуць пагутарыць са сваімі кумірамі і зрабіць на памяць фотаздымкі з зорнымі гасцямі. Для найбольш актыўных аматараў біятлона будзе прадастаўлена магчымасць паспрабаваць сябе ў якасці біятланіста-спартсмена.

Фестываль біятлона выйдзе далёка за межы біятлоннай трасы і прапануе аматарам адпачынку на адкрытым паветры шэраг іншых цікавых заняткаў. У іх распараджэнні будуць працаваць: дзіцячы спартыўны гарадок, маладзёжная спартыўная пляцоўка, спартыўныя атракцыёны для дарослых. Гледачы змогуць азнаёміцца з нацыянальнымі стравамі краін спартсменаў, прадстаўленых у Гонцы легенд, а госці Беларусі - купіць у створаным арганізатарамі горадзе майстроў унікальныя мясцовыя сувеніры.

Набыць білеты на фестываль можна на сайце ticketpro.by, а таксама ва ўсіх касах кампаніі Ticketpro. Усе выручаныя сродкі ад продажу білетаў пойдуць на будаўніцтва дзіцячага хоспіса ў Мінскай вобласці.

Арганізатарамі спаборніцтваў выступаюць Беларуская федэрацыя біятлона, Міністэрства спорту і турызму, Нацыянальны алімпійскі камітэт, Прэзідэнцкі спартыўны клуб.