Падзеі, факты, анонсы

Інклюзіўны праект пра сінтэз жывапісу Зянько і паэзіі Багдановіча прадставяць у Мінску

Фота Літаратурнага музея Максіма Багдановіча

2 лістапада, Мінск /Кар. БЕЛТА/. Інклюзіўны арт-праект мастака Васіля Зянько "Паэзія кропак... Багдановіч" адкрыецца 6 лістапада ў Літаратурным музеі Максіма Багдановіча ў Мінску, паведамілі БЕЛТА арганізатары.

"Карціны Васіля Зянько ўяўляюць сабой арганічны сінтэз жывапісу і паэзіі. Для кожнага твора ў якасці літаратурнай асновы ўзяты ўрыўкі з вершаў Максіма Багдановіча, у тым ліку са зборніка "Вянок". Ва ўсіх работах уверсе злева размешчаны ўрыўкі з вершаў паэта, якія пераведзены на шрыфт Брайля з захаваннем міжнародных стандартаў. Арт-праект здымае межы ў доступе для людзей са слабым зрокам да твораў мастацтва - гэта важны крок на шляху да стварэння безбар'ернага асяроддзя ў Беларусі", - адзначылі арганізатары.

Наведаць праект можна да 3 снежня.

Васіль Зянько скончыў Беларускую дзяржаўную акадэмію мастацтваў. Ён з'яўляецца старшынёй секцыі манументальна-дэкаратыўнага мастацтва Беларускага саюза мастакоў, членам Беларускага саюза дызайнераў. З 1995 года ўдзельнічае ў рэспубліканскіх і міжнародных выставах. Мастак рэалізаваў каля 20 персанальных арт-праектаў у Беларусі, Расіі і Польшчы. Творы Васіля Зянько знаходзяцца ў Нацыянальным мастацкім музеі Беларусі, Нацыянальным цэнтры сучасных мастацтваў Беларусі, Цэнтры сучаснага мастацтва ў Віцебску, Музеі сучаснага рускага мастацтва (Нью-Ёрк, ЗША), а таксама ў прыватных калекцыях Беларусі, Германіі, Нарвегіі, Расіі, Польшчы, Турцыі, Францыі.

версія для друку

зрабіць стартавай

дабавіць у выбранае