Падзеі, факты, анонсы

3 мая, Мінск /Кар. БЕЛТА/. На канцэрты XXVI Міжнароднага фестывалю мастацтваў "Славянскі базар у Віцебску" прададзена 23 тыс. білетаў і практычна 45 тыс. забраніравана, паведаміў журналістам дырэктар форуму Аляксандр Сідарэнка, перадае карэспандэнт БЕЛТА.

Ёсць праекты, на якія білеты былі раскуплены ўжо месяц таму. Дырэктар форуму адзначыў вялікую цікавасць гледачоў да мерапрыемстваў "Славянскага базару", у прыватнасці да канцэрта "Я люблю фестываль!". У ім прымуць удзел маладыя беларускія выканаўцы і калектывы, таксама запрошаны расійскія госці.

Яшчэ адзін канцэрт, які мае поспех, - да юбілею знакамітага ансамбля "Сябры". Ён пройдзе ў праграме Дня Саюзнай дзяржавы.

Акрамя таго, арганізатары фестывалю адзначаюць вялікую цікавасць гледачоў да творчасці ўкраінскіх выканаўцаў, што дало магчымасць з'яўленню праекта "Вітае Украіна", дзе выступяць народныя артысты і маладыя выканаўцы.

Гаворачы аб геаграфіі куплі білетаў, Аляксандр Сідарэнка адзначыў, што вялікую колькасць білетаў набываюць віцябчане. З кожным годам расце колькасць мінчан, якія купляюць білеты, а таксама паклоннікаў фестывальных праграм з бліжэйшых да Віцебска буйных гарадоў. Сярод краін, у якіх набываюць білеты, пераважаюць Расія, Украіна, Латвія, Літва. "Дзякуючы электроннай сістэме білеты набываюцца па ўсім свеце. Мы спадзяёмся, што ў гэтым годзе сваю ролю адыграе бязвізавы ўезд, хоць дакладней гэта будзе відаць напярэдадні фестывалю", - сказаў дырэктар форуму.

XXVI Міжнародны фестываль мастацтваў "Славянскі базар у Віцебску" пройдзе з 13 па 17 ліпеня (дадатковыя мерапрыемствы адбудуцца 10-12 і 18-19 ліпеня).