6 верасня, Мінск /Кар. БЕЛТА/. Мінск уваходзіць у тройку самых папулярных гарадоў для асенніх падарожжаў расіян. Такія даныя прадаставіў БЕЛТА сэрвіс пошуку атэляў RoomGuru.ru.
У топ-10 папулярных у расійскіх турыстаў замежных гарадоў у бархатны сезон уваходзяць Прага, Стамбул, Мінск, Баку, Рым, Барселона, Берлін, Варшава, Талін і Парыж. Паводле даных RoomGuru.ru, самыя эканамічныя замежныя гарады для паездак восенню - гэта Мінск (2,7 тыс. расійскіх рублёў за суткі) і Варшава (2,9 тыс. расійскіх рублёў за суткі). У сталіцу Беларусі браніруюць паездкі ў сярэднім на тры дні.
У першую дзясятку замежных краін па папулярнасці турыстычных паездак у бархатны сезон уваходзяць Грэцыя, Кіпр, Турцыя, Іспанія, Італія, Чэхія, Тайланд, Балгарыя, Чарнагорыя і Харватыя.
Рэйтынг складзены паводле даных пошуку і броні атэляў і апартаментаў для пражывання з 1 верасня па 31 кастрычніка 2016 года.