Падзеі, факты, анонсы

Мінск увайшоў у лік самых недарагіх для жыцця гарадоў свету

Фота з архiва

25 чэрвеня, Мінск /Кар. БЕЛТА/. Беларуская сталіца ўвайшла ў лік найбольш даступных гарадоў свету па кошце жыцця. Аб гэтым сведчаць даныя новага рэйтынгу сэрвісу Numbeo.

Пры складанні рэйтынгу ўлічваліся шэраг паказчыкаў, сярод якіх кошт прадуктаў харчавання, арэнда жылля, пакупная здольнасць насельніцтва. У аснову спіса, у якім 404 гарады, пакладзена параўнанне паўсядзённых расходаў з Нью-Ёркам, прынятым за эталон (100 працэнтаў) па кошце жыцця.

Гарады ў гэтым рэйтынгу размешчаны па змяншэнні - ад самых затратных да самых недарагіх. Так, Мінск у спісе займае 367 месца з 404. Такая пазіцыя сведчыць пра невысокі ўзровень паўсядзённых расходаў у параўнанні з большасцю сусветных мегаполісаў. Індэкс кошту жыцця ў беларускай сталіцы, паводле ацэнак партала, склаў 26,4.

У верхняй частцы спіса знаходзяцца шэсць швейцарскіх гарадоў: Цюрых, Жэнева, Базэль, Лазана, Лугана і Берн, дзе кошт жыцця вышэйшы, чым у Нью-Ёрку, які размясціўся на 7 радку. Індэкс кошту жыцця ва ўзначаліўшым спіс Цюрыху склаў 112,5. У дзясятку таксама ўвайшлі Рэйк'явік (96,2), Ганалулу (94,4) і Сан-Францыска (90,7). Замыкаюць рэйтынг, размясціўшыся на 402, 403 і 404 месцах адпаведна, тры індыйскія гарады - Лакхнау (17,9), Індаўр (17,7) і Каімбатур (17,1).

версія для друку

зрабіць стартавай

дабавіць у выбранае