23 сакавіка, Мінск /Кар. БЕЛТА/. Зніжэнне электраспажывання ў час правядзення міжнароднай акцыі "Гадзіна Зямлі" ў Беларусі склала 28 тыс. кВт/гадз, паведамілі карэспандэнту БЕЛТА ў прэс-службе Міністэрства энергетыкі.
"Для вызначэння эфектыўнасці акцыі "Гадзіна Зямлі", якая адбылася ў Беларусі 19 сакавіка з 20.30 да 21.30, праведзены экспертны аналіз аператыўных даных электраспажывання па аб'яднанай энергетычнай сістэме Беларусі з улікам тэмпературнага фактару і рэзкапераменнай нагрузкі прадпрыемства "Беларускі металургічны завод". Зніжэнне электраспажывання ў названы перыяд склала 28 тыс. кВт/гадз", - расказалі ў прэс-службе.
Разам з тым, у прэс-службе падкрэслілі, што акцыя мае сімвалічны характар і не прадугледжвае імгненнай значнай эканоміі рэсурсаў. "Важна звярнуць увагу на праблемы змянення клімату, навучыць людзей беражліва ставіцца да рэсурсаў, у тым ліку энергетычных, у паўсядзённым жыцці, а не толькі адзін раз у год", - адзначылі спецыялісты.
"Гадзіна Зямлі" ўпершыню прайшла ў 2007 годзе, традыцыйна да акцыі далучаюцца больш як 7 тыс. гарадоў па ўсім свеце. У Беларусі колькасць удзельнікаў "Гадзіны Зямлі" таксама расце з году ў год.-