Падзеі, факты, анонсы

2 лютага, Мінск /Уладзімір Мацвееў - БЕЛТА/. У будучым пры абароне навуковых прац могуць выкарыстоўвацца ў тым ліку анлайн-тэхналогіі, што зробіць гэты працэс яшчэ больш празрыстым і аб'ектыўным. Аб гэтым сёння ў час сустрэчы Прэзідэнта Беларусі Аляксандра Лукашэнкі з прадстаўнікамі навуковай сферы расказаў старшыня Вышэйшай атэстацыйнай камісіі Генадзь Пальчык, перадае карэспандэнт БЕЛТА.

Кіраўнік дзяржавы пацікавіўся, наколькі ў Беларусі выбудаваны сумленны і аб'ектыўны працэс прысваення саiскальнiкам вучоных званняў.

Ён адзначыў, што з'яўляецца прыхільнікам такіх падыходаў, якія забяспечаць аб'ектыўнасць і ўзнімуць з ліку вучоных самых дастойных. "Непрыстойнасць непрымальна ў навуцы. Не павінна быць тут ніякіх блату, сваякоў, сяброў. Усё павінна быць сумленна, аб'ектыўна", - падкрэсліў беларускі лідар.

"Працэдура праходжання навуковай экспертызы ўсіх работ прайшла ў рамках заканадаўства. Разгляд быў вельмі дэталёвы, падрабязны і адкрыты. Мы робім крокі да поўнай публічнасці. І наступны наш крок - прадстаўляць у выглядзе магчымасці ў рэжыме анлайн. Гэта значыць публічнасць і аб'ектыўнасць навуковай экспертызы мы забяспечваем", - сказаў Генадзь Пальчык.

Паводле яго слоў, работу ў гэтым напрамку плануецца арганізаваць паэтапна. "У першую чаргу з магчымасцю ў рэжыме анлайн прыцягваць да працэдуры абароны замежных вучоных. З таго ж Новасібірскага акадэмгарадка, каб без страт часу і фінансавых цяжкасцей вядучаму вучонаму ўдзельнічаць у працэдуры абароны дысертацыі ў Беларусі. Гэта павысіць і наш статус, і аб'ектыўнасць", - адзначыў старшыня ВАК.

Ён дадаў, што адкрытасць і прыцягненне вядучых замежных вучоных у тым ліку дасць магчымасць мінімізаваць чалавечы фактар пры ацэнцы навуковых прац.