Падзеі, факты, анонсы

Лыжніца Каралёва стала 34-й у алімпійскім скіятлоне

7 лютага, Мінск /Кар. БЕЛТА/. Беларуская лыжніца Ганна Каралёва паказала 34-ы рэзультат у першай гонцы на XXV Зімовых Алімпійскіх гульнях у Італіі, паведамляе карэспандэнт БЕЛТА.

На старт жаночага скіятлона 10+10 км выйшлі 70 дзяўчат. Пасля першай палавіны дыстанцыі класічным стылем Ганна займала 35-е месца, на другой частцы трасы каньковым ходам паднялася на радок уверх і ў выніку фінішавала 34-й, уступіўшы лідару шэсць мінут. Чэмпіёнкай стала шведка Фрыда Карлсан, серабро ўзяла яе суайчынніца Эба Андэрсан, бронза - у нарвежкі Хейдзі Венг.

Для Каралёвай Алімпіяда-2026 з'яўляецца першай у кар'еры. 10 лютага беларуску чакаюць спаборніцтвы ў класічным спрынце, 12 лютага Ганна прыме ўдзел у гонцы з раздзельнага старту. Лепшы рэзультат нашай лыжніцы ў кар'еры на Кубку свету - 33-я пазіцыя ў мас-старце на этапе месячнай даўнасці ў Італіі.

Сёння ў 18.00 па мінскім часе на дыстанцыі 3000 м выступіць беларуская канькабежка Марына Зуева. У наступныя дні на Гульнях будуць прадстаўлены нашы Вікторыя Сафонава (фігурнае катанне), Марыя Шканава (гарналыжны спорт), Ганна Гуськова, Ганна Дзяруга і Настасся Андрыянава (лыжная акрабатыка). XXV Зімовыя Алімпійскія гульні завершацца 22 лютага.

"Гонка атрымалася вельмі дынамічнай". Лыжніца Каралёва аб алімпійскім дэбюце

8 лютага, Мінск /Кар. БЕЛТА/. Лыжніца Ганна Каралёва падзялілася ўражаннямі аб дэбюце на Алімпійскіх гульнях і падвяла вынік першай гонкі ў Італіі, паведамілі БЕЛТА ў прэс-службе НАК.

У жаночым скіятлоне на 10+10 кіламетраў беларуская лыжніца заняла 34-е месца сярод 70 удзельніц, уступіўшы шэсць мінут шведцы Фрыдзе Карлсан, якая перамагла. Гэта гонка стала для Ганны першай у кар'еры на Алімпіядах.

"Гонка атрымалася вельмі дынамічнай. Мне спадабалася атмасфера: шмат балельшчыкаў па ўсёй дыстанцыі, жывыя калідоры. Умовы былі даволі няпростыя. Некалькі дзён запар ішоў дождж і траса пры плюс 6 разбіваецца вельмі моцна. Даводзілася ехаць па кашы, а на спусках гэта вельмі небяспечна і цяжка. У цэлым сваім станам я задаволена, хоць па такой трасе бегаць не люблю, - сказала Ганна Каралёва. - За час адхілення канкурэнцыя вырасла. Усе дабаўляюць, але мы таксама не стаім на месцы. Паступова прывыкаем да гэтых умоў, да гэтага снегу. Ён тут хутчэйшы, чым у Расіі. Трэба адаптавацца".

Таксама спартсменка падзякавала беларускім балельшчыкам за падтрымку і паабяцала прыкласці ўсе намаганні, каб паказаць максімум у астатніх гонках. "Кожны дзень у мяне па дзве трэніроўкі. У вольны час спрабую адпачыць і аднавіць сілы. Імкнуся ў гэтыя паўзы таксама трымаць сувязь з роднымі, таму што ў такія дні важна падтрымка. Хачу сказаць дзякуй усім маім блізкім і ўсёй Беларусі за тое, што глядзіце і балееце. Вельмі прыемна".

10 лютага Каралёва прыме ўдзел у кваліфікацыі класічнага спрынту, а 12 лютага выступіць у гонцы з раздзельнага старту.

версія для друку

зрабіць стартавай

дабавіць у выбранае