Падзеі, факты, анонсы

Кунцэвіч: на "Славянскі базар" акрэдытаваны 555 прадстаўнікоў СМІ

10 ліпеня, Віцебск /Алеся Пушнякова - БЕЛТА/. Для асвятлення мерапрыемстваў XXXIV Міжнароднага фестывалю мастацтваў "Славянскі базар у Віцебску" акрэдытаваны 555 прадстаўнікоў беларускіх і замежных СМІ. Аб гэтым на адкрыцці міжнароднага прэс-цэнтра фестывалю паведаміў першы намеснік міністра інфармацыі Рэспублікі Беларусь Андрэй Кунцэвіч, перадае карэспандэнт БЕЛТА.

"У гэтым годзе для асвятлення мерапрыемстваў XXXIV Міжнароднага фестывалю мастацтваў "Славянскі базар у Віцебску" акрэдытаваны 555 прадстаўнікоў СМІ. З іх 466 прадстаўнікоў 35 беларускіх СМІ, 89 журналістаў ад 44 СМІ з дзевяці дзяржаў - Азербайджана, Балгарыі, Італіі, Кітая, Расіі, Турцыі, Узбекістана, Швейцарыі, Эстоніі. Гэта больш, чым у мінулым годзе, і па колькасці журналістаў, і па колькасці СМІ", - расказаў Андрэй Кунцэвіч.

Першы намеснік міністра падкрэсліў, што работа журналістаў на фестывалі вельмі важная. "Лічу, што, бачачы намаганні арганізатараў, прэса, якая працуе на фестывалі, адказвае гэтаму фестывалю ўзаемнасцю. Ва ўсякім разе пацвярджэнне таму - усё большая колькасць прадстаўнікоў СМІ, якія акрэдытаваліся для работы на фестывалі", - адзначыў ён.

Таксама Андрэй Кунцэвіч расказаў аб асаблівасцях работы ў гэтым годзе новых медыя. "Да асаблівасцей гэтага года я аднясу актыўнасць у частцы жадання акрэдытавацца для работы на фестывалі прадстаўнікоў новых медыя, я маю на ўвазе блогасферу. Усяго мы атрымалі больш за 50 заявак ад блогераў, якія ўсе былі задаволены. У іх ліку нямала зусім юных прадстаўнікоў, якія спрабуюць сябе ў гэтай якасці. Самаму малодшаму блогеру, акрэдытаванаму для работы на "Славянскім базары", 9 гадоў. Гэта юнакі і дзяўчаты, якія займаюцца ў медыялабараторыі Віцебскай вобласці, у дзіцячай студыі абласнога палаца дзяцей і моладзі і шэрагу іншых устаноў", - сказаў Андрэй Кунцэвіч.

версія для друку

зрабіць стартавай

дабавіць у выбранае