20 лістапада, Віцебск /Кар. БЕЛТА/. На камернай сцэне Нацыянальнага акадэмічнага драматычнага тэатра імя Якуба Коласа 22 лістапада пакажуць рамантычную казку "Усе мышы любяць сыр" паводле п'есы венгерскага драматурга Дзьюлы Урбана, паведамілі БЕЛТА ў тэатры.
Пераклаў твор на беларускую мову Пятро Ламан. Рэжысёр-пастаноўшчык - заслужаны артыст Беларусі Вячаслаў Грушоў. Сцэнаграфія і касцюмы Святланы Макаранка. Музыка і музычнае афармленне Аляксандра Крыштафовіча.
Казка раскажа пра чарадзейную сілу дабра. "Яе галоўныя героі - два вясёлыя мышаняты Фружы і Шома. Яны маглі б сябраваць і гора не зазнаць, але перад імі ўзнікае сур'ёзная перашкода: Фружы белага колеру, а Шома - шэрага. Гэту розніцу бачаць усе, а асабліва бацькі герояў, якія пастаянна спрачаюцца адзін з адным і са сваімі дзецьмі. На шчасце, на дапамогу мышанятам прыходзіць Ізольда - Вялікая Чарадзейка-Кошка. У фінале гісторыі ўсё становіцца на свае месцы і героі знаходзяць шчасце. Бо на самай справе колер не галоўнае, а важна, што ўсе мышы без выключэння любяць сыр", - адзначылі ў тэатры.
У спектаклі іграюць віцебскія акцёры. Гэта Валянціна Багданава, Анжаліка Баркоўская, Вадзім Асвяцінскі, Герман Дымарэцкі, Аляксандр Казлоў, Уладзіслаў Жураўлёў, Наталля Аладка, Ніна Обухава, Паліна Крашэўская, Таццяна Рогат, Святлана Жукоўская і Вольга Куляшова.