Падзеі, факты, анонсы

Каляндар падзей у Беларусі: ЖНIВЕНЬ 2023

Мерапрыемства "Лошыцкая сядзіба ў ХІХ – пачатку ХХ стагоддзяў"

Адна з самых папулярных выдатных мясцін Мінска – Лошыцкая сядзіба – запрашае адправіцца ў музычнае падарожжа. У час экскурсіі па сядзібе наведвальнікі не толькі ўбачаць стылізаваныя інтэр'еры, у якіх жылі знакамітыя ўладальнікі Яўстафій Прушынскі, Іван і Яўстафій Любанскія, але і даведаюцца пра іх лёсы, прывычкі, уклад жыцця, сакрэты, якія захоўваюць гэтыя сцены. Музычнымі ілюстрацыямі да экскурсіі стануць паланэз дыпламата і кампазітара Міхала Клеафаса Агінскага "Развітанне з Радзімай", твор Напалеона Орды "Серэнада", п'еса са зборніка "Полацкі сшытак", творы нямецкага кампазітара-лірыка Іаганеса Брамса і рускага кампазітара-філосафа Аляксандра Скрабіна.

Калі: кожную нядзелю ў 15.00 і 17.00
Дзе: Музей "Лошыцкая сядзіба", праезд Чыжэўскіх, 10, Мінск

Летні музычна-турыстычны сезон у Мінску

У гістарычным цэнтры Мінска – Верхнім горадзе, на тэрыторыі Траецкага і Ракаўскага прадмесцяў – 13 мая стартуе летні музычна-турыстычны сезон, які прадоўжыцца да верасня. Важнай асаблівасцю гэтага года стане правядзенне Дзён культуры гарадоў-пабрацімаў беларускай сталіцы, у ліку якіх Санкт-Пецярбург, Калуга, Ніжні Ноўгарад, Новасібірск і іншыя. Сумесна з пасольствам КНР і артыстамі з Паднябеснай 27 мая на пляцоўцы "Верхні горад" пройдзе маштабнае культурнае мерапрыемства "Свет чаю". Арганізатары абяцаюць, што ў сезоне-2023 прадоўжаць работу любімыя мінчанамі і гасцямі праекты. На адкрытай тэрыторыі атэля "Манастырскі" з 20.00 да 22.00 па суботах у рамках праекта "Тэатральны дворык" будуць праходзіць паказы студэнцкіх аматарскіх калектываў, а таксама выступленні прафесійных акцёраў тэатраў сталіцы. "Бібліятэка пад адкрытым небам" па суботах з 13.00 да 17.00 запрашае на інтэрактыўныя сустрэчы з пісьменнікамі для дзіцячай і дарослай аўдыторыі. З мая запрашае на канцэрт вулічных музыкантаў праект "Пешаходка".

Калі: 13 мая – верасень
Дзе: гістарычны цэнтр Мінска

Спартыўна-культурны фестываль "Вытокі. Крок да Алімпу"-2023

Любімы многімі беларусамі і гасцямі краіны спартыўна-культурны фестываль "Вытокі. Крок да Алімпу" адкрывае свой трэці сезон. Месцам старту выбраны "Горад металургаў" Жлобін. У пятніцу 19 мая адбудуцца вулічны мастацкі інтэрактыў "Гуляйце з намі – малюйце самі" ад сталічнай галерэі "АртХаос", а таксама вячэрнія паказы – мюзікла-прытчы Маладзёжнага тэатра эстрады "Як ноч стала дзяўчынай" і спартыўнай стужкі ў кінатэатры пад адкрытым небам. Асноўныя падзеі разгорнуцца ў суботу 20 мая. Гасцей чакаюць цырымонія адкрыцця, алімпійскі квест, займальныя пляцоўкі больш як па 25 відах спорту, фінал абласнога этапу новага інтэлектуальна-адукацыйнага праекта "Вытокі. Quiz", прэзентацыя калекцый адзення "Роднае-моднае" беларускіх прадпрыемстваў і дызайнераў. Акрамя таго, у трэцім сезоне культурная праграма прадстаўляе новы конкурс песеннага тэксту "Вершы пра галоўнае". Таксама ў рамках фестывалю журы вызначыць лепшых маладых выканаўцаў у вакальным конкурсе. Завершыць праграму вячэрні гала-канцэрт з удзелам папулярных артыстаў беларускай эстрады.

Калі, дзе:
19-20 мая – Жлобін
2-3 чэрвеня – Баранавічы
16-17 чэрвеня – Слонім
23-24 чэрвеня – Глыбокае
18-19 жніўня – Касцюковічы
25-26 жніўня – Барысаў

"Неверагодны атракцыён" у Белдзяржцырку

На летні перыяд Белдзяржцырк ператворыцца ў "Неверагодны атракцыён", дзе адбываюцца дзіўныя з'явы: "Кола агляду" становіцца захапляючым "Колам смеласці", а прывычны "Цір" – экстрэмальным "Кіданнем нажоў"! Толькі тут магчыма "немагчымае": кошкі выконваюць трукі ў паветры, а матацыкламі кіруюць мядзведзі, чалавек мацнейшы за аўтамабіль... У праграму новага шоу ўвайшлі такія нумары, як эквілібр на канаце, паветраная гімнастка на корд-дэ-парэлі, акрабатычная дарожка, гімнасты ў коле і на трапецыі, сілавы атлет. Таксама на манежы з'явяцца любімыя дзецьмі дрэсіраваныя мядзведзі, кошкі і поні.

Калі: 26 мая – 19 жніўня
Дзе: Беларускі дзяржаўны цырк, пр. Незалежнасці, 32, Мінск

Выстава "Аляксей Глебаў. Праслаўляючы чалавека" ў НММ

Выстава скульптара і педагога Аляксея Глебава ў НММ прымеркавана да юбілейнай даты – 115-годдзя з дня нараджэння народнага мастака БССР. Яго творчы шлях супаў па часе з фарміраваннем і станаўленнем беларускай скульптурнай школы. Творчая спадчына майстра – гэта манументальная пластыка, сюжэтна-тэматычныя кампазіцыі, камерныя станковыя творы і, вядома, выгадаваныя ім за дзясятак гадоў выкладання вучні-скульптары. Экспазіцыя ахоплівае мастацкія творы, створаныя ў 1940-я – 1960-я гады. Дапоўнілі яе жывапісны, скульптурны і графічныя партрэты Аляксея Глебава, аўтарамі якіх сталі калегі па творчым цэху, а таксама відэафільм і радыёперадача пра скульптара.

Калі: 16 чэрвеня – 13 жніўня
Дзе: Нацыянальны мастацкі музей Беларусі, вул. К. Маркса, 24, Мінск

Vulitsa Ezha: летні сезон-2023 у Мінску

Vulitsa Ezha 2023 прадстаўляе адразу чатыры фестывалі. Першы стартаваў у маі на ўтульнай гастранамічнай пляцоўцы "ЛЕПшая вуліца", якая адкрылася для наведвальнікаў у мінулым годзе. Наступныя тры адбудуцца ў засені дрэў Батанічнага саду. У праграме – майстар-класы, інтэрактывы, дэгустацыі, жывая музыка і танцы пад адкрытым небам пад рытмы розных стыляў. Зразумела, месцам прыцягнення застанецца вялікі фуд-корт з вулічнай ежай – традыцыйнай і арыгінальнай аўтарскай.

Калі: 22–23 ліпеня, 2–3 верасня
Дзе: Цэнтральны батанічны сад НАН Беларусі, вул. Сурганава, 2в, Мінск

Выстава "Мэтры мастацкага алімпу: Хаім Суцін і Марк Шагал" у Мінску

Ураджэнцы Беларусі Хаім Суцін і Марк Шагал – мастакі ХХ стагоддзя, прадстаўнікі знакамітай Парыжскай школы – сталі героямі работ Алега Папельскага, створаных ва ўнікальнай тэхналогіі з выкарыстаннем натуральных камянёў. Прадстаўленыя ў розных камбінацыях камянёў карціны з'яўляюцца амажамі (hommage), што ў перакладзе з французскага абазначае даніну творчасці мастака. Цыкл "Дарога ў вечнасць" расказвае аб жыццёвых перыпетыях Хаіма Суціна, яго дзяцінстве ў родных Смілавічах, іўдзейскіх традыцыях, абрадах і ўкладзе сям'і. Другі цыкл – "Ля цёплага дома душы" – прысвечаны творчасці Марка Шагала, дзе галоўным элементам з'яўляецца сінагога, а дапаўняюць кампазіцыю персанажы работ майстра – жыхары роднага яму горада Віцебска.

Калі: да 1 кастрычніка
Дзе: Музей гісторыі горада Мінска, вул. Ракаўская, 17, Мінск

Фестываль беларускай нацыянальнай кухні "Дзвінскі смак" у Здраўнёве

Дранікі, клёцкі, крупнік, хрушчы – усё гэта ў летнім сезоне могуць прадэгуставаць госці знакамітай сядзібы Ільі Рэпіна ў Здраўнёве. Гастранамічнае свята аб'яднала каля 20 клубаў беларускай нацыянальнай кухні розных раёнаў Віцебскай вобласці. Так, напрыклад, фірменныя стравы народнага калектыву "Смак" з Чашнікаў – сыры дамашняй вытворчасці і зразы – мясныя рулецікі з начынкай. "Разынка" з Шуміліна пачастуе крупнікам са спірту, мёду і спецый. А візітнай карткай клуба "Стайскія прысмакі" з Лепельскага раёна лічацца клёцкі з душамі, унесеныя ў скарбніцу нематэрыяльнай спадчыны Віцебшчыны.

Калі: чэрвень–жнівень (па суботах, 11.00–15.00)
Дзе: тэрыторыя музея-сядзібы І. Я. Рэпіна "Здраўнёва", Віцебскі раён
Даведацца падрабязней

Музычныя выхадныя: летнія канцэрты ў Аляксандраўскім скверы

У самым сэрцы беларускай сталіцы – на пляцоўцы ля Купалаўскага тэатра ў Аляксандраўскім скверы – кожныя выхадныя мінчане і госці горада могуць атрымліваць асалоду ад творчасці вядомых фальклорных, вакальных і танцавальных ансамбляў краіны. У жніўні публіку парадуюць аркестр і вакальная група Пагранічнай службы Беларусі (5 жніўня), артысты Маладзёжнага тэатра эстрады (12 жніўня), Беларускі дзяржаўны акадэмічны харэаграфічны ансамбль "Харошкі" (19 жніўня). Знамянальным стане канцэрт-прысвячэнне ад Нацыянальнага акадэмічнага канцэртнага аркестра імя М. Я. Фінберга памяці маэстра і заснавальніка калектыву (26 жніўня). Асеннюю старонку перагорне "Музычны вечар з Вялікім тэатрам" (2 верасня), а таксама 9 верасня праграму "Музыка кіно" прадставіць Нацыянальны акадэмічны народны аркестр Беларусі імя І. Жыновіча Белдзяржфілармоніі.

Калі: 3 чэрвеня – 9 верасня (па суботах, 16.00–17.30)
Дзе: Аляксандраўскі сквер, Мінск
Даведацца падрабязней

Фестываль акадэмічнай арганнай і камернай музыкі "Вялікае мастацтва аргана"

"Вялікае мастацтва аргана" аб'яднае знатакоў арганнай і камернай музыкі: усяго за тры месяцы перад публікай выступяць 3 камерныя калектывы і 13 канцэртуючых арганістаў, якія дадуць 33 канцэрты. Сімвалічна, што фестываль адкрыўся ў Пінску: першыя акорды форуму прагучалі на другім па велічыні гістарычным аргане краіны, які знаходзіцца ў кафедральным касцёле Ушэсця Маці Божай. Прадоўжыць музычны марафон вёска Мядзведзічы Ляхавіцкага раёна. Публіку чакае сем канцэртаў, якія адбудуцца па выхадных па 10 верасня і дазволяць атрымаць асалоду ад гучання адноўленага стогадовага аргана.

Дзе, калі:
2 ліпеня – 10 верасня – в. Мядзведзічы, Ляхавіцкі раён
канец ліпеня – пачатак верасня – майстар-класы ў Пінску
24 жніўня і 13 верасня – канцэрты ў Віцебскай абласной філармоніі
Даведацца падрабязней

Cinemascope #shhh у Мінску: бясшумнае кіно пад адкрытым небам

Праект Cinemascope #shhh адкрывае трэці сезон, прадаўжаючы знаёміць мінчан і гасцей сталіцы з лепшымі стужкамі сусветнага кінематографа. Вячэрнія сеансы праходзяць пад адкрытым небам з выкарыстаннем спецыяльных бесправадных навушнікаў, якія працуюць на радыёчыстаце. Такім чынам, такія мерапрыемствы арганічна ўпісваюцца ў гарадское асяроддзе, не парушаючы спакой жыхароў навакольных дамоў. Фільмы дэманструюцца на мове арыгінала з рускімі субцітрамі. У афішы месяца прадстаўлены шэдэўры такіх рэжысёраў, як Жак Таці, Стэнлі Донен, Джын Келі, Эрык Рамер, Ітан Коэн, Джоэл Коэн, Браян дэ Пальма, Білі Уайлдэр, Жан-Люк Гадар, Рыдлі Скот, Стэнлі Кубрык…

Калі: 25 ліпеня – 29 жніўня
Дзе: дворык Мемарыяльнага музея-майстэрні З. І. Азгура, вул. Азгура, 8, Мінск

II Гульні краін СНД у Беларусі

Грандыёзнае спартыўнае свята – II Гульні краін СНД – адбудзецца ў Беларусі і разгорнецца адразу ў 11 гарадах краіны. Талісман маючага адбыцца турніру – беларуская рысь па імені Рыся, а слоган гучыць як "Моцны характар – яркая гульня!". За ўзнагароды ў 20 відах спорту пазмагаюцца больш за 4 тысячы атлетаў. З праграмы дэбютнага турніру ў Казані (а гэта 18 відаў спорту) уключаны ўсяго 9. Упершыню на беларускіх Гульнях будуць прадстаўлены валейбол, гандбол, каратэ, лёгкая атлетыка, пляжны валейбол і футбол, плаванне, сучаснае пяцібор'е, стральба з лука, цяжкая атлетыка, хакей на траве. Акрамя каманд з краін СНД гатоўнасць прыняць удзел у спартыўным свяце выказалі дэлегацыі з Бахрэйна, Егіпта, Ірана, Кітая, Кубы, Лівана, Сірыі…

Калі: 4–14 жніўня
Дзе: 11 гарадоў Беларусі
Даведацца больш

II рэгіянальны гастраэкалагічны фестываль "Палескі ўюн"

"Палескі ўюн" другі раз разгорнецца на беразе возера Гарадзішчанскае, аб'яднаўшы тэмы гастраноміі і экалагічнага турызму. У забаўляльную праграму ўвойдуць кулінарная "Бітва на чарпаках", воднае шоу, дэманстрацыя работы кінолагаў, пінскіх пагранічнікаў, шоу "Феерыя вады і пены", паказальныя выступленні беларускіх ратавальнікаў. Акрамя таго, госці фестывалю змогуць убачыць выступленні калектываў мастацкай самадзейнасці Пінскага раёна, а таксама атрымаць асалоду ад страў палявой кухні. Кульмінацыяй вячэрняй праграмы стане канцэрт пры ўдзеле Анатоля Ярмоленкі і ансамбля "Сябры", а таксама лазернае шоу і святочны салют.

Калі: 5 жніўня, 10.00
Дзе: в. Гарадзішча, Пінскі раён, эколага-турыстычны комплекс "Цішыня"

Фестываль сярэдневяковай культуры "Мсціслаўскі фэст-2023"

Рыцарскі фестываль у старажытным Мсціславе (у бягучым годзе гораду споўніцца 888 гадоў) прадоўжыць свае традыцыі і збярэ аматараў сярэдневяковай атмасферы і відовішчных паядынкаў. Праграма рыцарскага фэсту-2023 уключае тэатралізаваны паказ "Аднойчы на Дзікім полі", бой пешых рыцараў, сярэдневяковую казку "Легенда аб княжацкіх дочках", тактычныя рыцарскія бугурты, масавыя бітвы, турнір лучнікаў, відовішчны штурм замка, вогненнае шоу і выступленні музычных груп, сярод якіх "Адамант", "Стокс", КаЅ, "Рэд фокс бэнд". Таксама госці ўбачаць конны турнір і паказальныя выступленні наезнікаў, наведаюць рынак майстроў і народных умельцаў, прымуць удзел у майстар-класах.

Калі: 5 жніўня, 11.30
Дзе: Замкавая гара, Мсціслаў, Магілёўская вобласць

Свята "Іўеўскі памідор-2023"

З надыходам шчодрага на ўраджаі жніўня рыхтуецца прыняць гасцей Іўе – "таматная сталіца Беларусі" і адзін з самых маладых гарадоў Гродзеншчыны. Сёмае па ліку брэндавае свята супала з Днём горада, які адзначаць 12 жніўня. Разам з ужо традыцыйнай бітвай памідорамі "Іўе дэ-таматэйра" гасцей чакаюць памідорны дартс, конкурс прыгажосці "Чырвоная каралева", галерэя "Гісторыя свята". Адкрыецца смачны форум тэатралізаваным шэсцем "Памідорны бум". А далей разгорнуцца творчыя конкурсы і вясёлыя тэматычныя спаборніцтвы – "Сеньёр памідор" (самы вялікі вырашчаны памідор), "Таматная сямейка", "Чэры-2023" (лепшы дзіцячы карнавальны касцюм). Таксама кожны зможа выбраць і набыць самыя сакавітыя памідоры да дамашняга стала, прадэгуставаць мноства страў з таматамі і пакаштаваць фірменны іўеўскі бутэрброд.

Калі: 12 жніўня, 13.00
Дзе: Іўе, Гродзенская вобласць

Экалагічны фестываль "Спораўскія сенакосы"

Адно з прыгажэйшых на Брэстчыне і ва ўсёй Беларусі возера Спораўскае знаходзіцца на мяжы Бярозаўскага і Драгічынскага раёнаў. А тутэйшы заказнік стаў першым у Беларусі, які атрымаў міжнародны статус аховы Рамсарскага ўгоддзя. Кожны год у гэтых мясцінах збіраюцца ўмелыя касцы, каб прадэманстраваць свае навыкі і паспаборнічаць за званне лепшага на чэмпіянаце па ручной касьбе. Адна з мэт арганізатараў – прыцягнуць увагу грамадства да экалагічных праблем захаванасці беларускіх балот і тарфянікаў. На тэрыторыі заказніка жыве вяртлявая чарацянка, якая адносіцца да рэдкіх птушак і якой пагражае выміранне ў сувязі з зарастаннем балот. Акрамя чэмпіянату гасцей чакаюць турнір па футболе на балоце, майстар-класы па сплаве на байдарках, палёты на дэльтаплане, забаўляльная праграма.

Калі: 12 жніўня
Дзе: заказнік "Спораўскі", в. Перасудавічы, Бярозаўскі раён, Брэсцкая вобласць

800-годдзе горада Нясвіжа

Адзін са старэйшых гарадоў Беларусі – Нясвіж – адзначае 800-годдзе. Ён вядомы сваёй архітэктурнай жамчужынай – былой рэзідэнцыяй княжацкага роду Радзівілаў Нясвіжскім замкам, унесеным у Спіс Сусветнай спадчыны ЮНЕСКА. Сярод іншых выдатных мясцін – барочны Фарны касцёл, спраектаваны італьянскім архітэктарам Джавані Бернардоні, Слуцкая брама, ратуша і прамавугольная Замкавая вежа. Да юбілейнай даты горад падрыхтаваўся грунтоўна: праведзены рамонт жылых дамоў, будынкаў і помнікаў, абноўлена дарожнае пакрыццё, добраўпарадкаваны набярэжная і скверы, створаны муралы на фасадах будынкаў. Падарункам жыхарам горада стане адкрыццё новай паліклінікі. У святочны дзень адбудуцца парад стылізаванай тэхнікі "Нясвіж: 800 гадоў у шляху", фестываль гістарычных рэканструкцый "Нясвіжская фартэцыя", II фестываль кветак "Кветкі Палаца". Сярод яркіх падзей – фестывалі фарбаў, сыру і марожанага.

Калі: 12 жніўня
Дзе: Нясвіж, Мінская вобласць

XII Міжнародны фестываль "Мотальскія прысмакі"

Адзін з самых знакамітых гастрафестываляў Беларусі – "Мотальскія прысмакі" – 12-ы раз запрашае знатакоў нацыянальнай кухні атрымаць асалоду ад страў, прыгатаваных па старадаўніх рэцэптах, дамашніх нарыхтовак і ласункаў ад мясцовых гаспадынь. У бягучым годзе ў Моталь з'едуцца прадстаўнікі розных этнічных груп з усёй краіны. У праграме фэсту-2023 – тэатралізаванае шэсце – адкрыццё, канцэрт, круглы стол "Нацыянальная кухня-ключ да дружбы народаў". Прыедуць і прадстаўнікі з пабраціма Моталя – вёскі Тургенеўка Іркуцкай вобласці, заснаванай у 1909 г. перасяленцамі з Заходняга Палесся. Гасцей фестывалю чакаюць баль, майстар-класы палескіх бытавых танцаў, народная музыка і гумар, фестываль дзіцячай і юнацкай творчасці "Мотальскія перазвоны", фольк-шоу і святочны феерверк.

Калі: 12–13 жніўня
Дзе: аграгарадок Моталь, Іванаўскі раён, Брэсцкая вобласць
Даведацца падрабязней

Хрэсны ход Жыровічы – Мінск

Хрэсны ход са Свята-Успенскага Жыровіцкага манастыра ў мінскі Святадухаўскі кафедральны сабор прысвечаны 850-годдзю з дня смерці прападобнай Ефрасінні Полацкай. За 9 дзён праваслаўныя паломнікі з розных краін пераадолеюць 250 км. Маршрут пралягае праз 4 епархіі і 18 храмаў. Прыняць удзел можа любы жадаючы на любым адрэзку шляху. Сімвалічна, што завершыцца малітоўнае шэсце 26 жніўня – у дзень памяці Мінскай іконы Божай Маці, якая, паводле царкоўнага падання, была створана евангелістам Лукой і здабыта ў водах Свіслачы ў 1500 годзе. Нягледзячы ны ганенні на царкву і ваенную разруху, праваслаўная святыня ўцалела і з 1945-га года знаходзіцца ў Святадухаўскім кафедральным саборы Мінска.

Калі: 18–26 жніўня
Дзе: Свята-Успенскі Жыровіцкі манастыр, Жыровічы, Слонімскі раён, Гродзенская вобласць – Святадухаўскі кафедральны сабор, Мінск

Каравай-фэст "Бацькава булка"-2023

Каларытнае свята ў горадзе Свіслач адкрыецца канцэртам "Рэцэпт сямейнага хлеба", вядучымі якога стануць вядомыя ў рэгіёне гумарыстычныя персанажы Васіль і Гандзя. Вясёлую ноту падхопяць беларускія гумарысты з канцэртам "І смех, і мех". Асноўнымі эпізодамі каравай-фэсту стануць "Бульчэ ўсіх!" – цырымонія ўзнагароджвання пераможцаў, "Бацькаўшчына" – выстава конкурсных шэдэўраў прафесійных пекараў краіны, "Матулін каравай" – выстава работ пекараў-аматараў. Гэтай жа тэме будзе прысвечаны канцэрт артыстаў беларускай эстрады "Мір! Праца! Хлеб!". І вядома ж, гераіняй фестывалю стане "Бацькава булка" – тая самая свіслацкая пляцёнка, якая нагадала Прэзідэнту Беларусі Аляксандру Лукашэнку смак дзяцінства ў час яго рабочага візіту ў Свіслач у чэрвені 2021 года.

Калі: 19 жніўня
Дзе: Свіслач, Гродзенская вобласць
Даведацца падрабязней

Міжнародны фестываль славянскай міфалогіі "Шлях Цмока-2023"

Фестываль славянскай міфалогіі "Шлях Цмока", які ўпершыню адбыўся ў верасні 2019 года, ужо стаў адной з брэндавых падзей Бярэзінскага біясфернага запаведніка. Адкрыецца фестываль-2023 шэсцем і квестам ад міфалагічных персанажаў, пазней гасцей чакаюць музычная праграма, падвядзенне вынікаў квеста, вогненнае шоу і начная экскурсія па экалагічнай сцежцы "У краі міфаў". На фестывальнай тэрыторыі разгорнуцца сярэдневяковая, тэатральная і шаманская лакацыі, а таксама адкрыюцца горад майстроў, мастацкая выстава, клуб рамеснікаў, будуць выступаць творчыя калектывы. На другі дзень адбудуцца кінапаказы ў Доме экалагічнай асветы, экскурсіі па экасцежцы "У краі міфаў", а таксама ў самабытных музеях – прыроды, мёду і міфалогіі.

Калі: 19–20 жніўня
Дзе: Бярэзінскі біясферны запаведнік, вул. Цэнтральная, 3, в. Домжарыцы, Лепельскі раён, Віцебская вобласць

Экалагічны тыдзень у Беларусі

Экалагічны тыдзень Беларусі адкрыецца на II Міжнароднай спецыялізаванай выстаўцы ECOLOGY EXPO – 2023 у Мінску, дзе асноўнымі тэмамі стануць скарачэнне выкідаў, перапрацоўка адходаў, экатурызм, развіццё экаўпакоўкі, а таксама ўкараненне іншых перадавых тэхналогій, якія дазволяць скараціць выкарыстанне прыродных рэсурсаў. Прадоўжыцца праграма ў горадзе Століне (Брэсцкая вобласць): тут разгорнецца XVII Рэспубліканскі экалагічны форум, прысвечаны абвешчанаму ў 2023-м Году міру і стварэння. Гэта пляцоўка для аб'яднання грамадства ў вырашэнні праблем аховы навакольнага асяроддзя, максімальнага ўключэння насельніцтва рэспублікі ў экалагічны рух, павышэння экалагічнай культуры, пашырэння прынцыпаў устойлівага развіцця, фарміравання экалагічна дружалюбнага ладу жыцця.

Калі: 22–26 жніўня
Дзе: Мінск, Столін

Дзень горада Салігорска: 65-годдзе, тэатралізаванае шоу, парад маладых

Сталіца беларускіх шахцёраў, заснаваная ля аднаго з буйнейшых у свеце радовішчаў калійнай солі, і другі па колькасці горад Мінскай вобласці – Салігорск – адзначае 65-годдзе. Стартуе свята 24 жніўня. На Плошчы мастацтваў запланаваны актыўнасці для дзяцей і дарослых, канцэртныя, танцавальныя праграмы, сілавы экстрым. Ушаноўванне перадавікоў і фестываль джазавай музыкі пройдуць 25 жніўня на пляцоўцы ля ААТ "Беларуськалій". У асноўны дзень – 26 жніўня – адбудуцца тэатралізаванае шэсце і парад маладых 2023 года, а затым гулянні разгорнуцца ў Парку чатырох стыхій. Будуць працаваць гандлёвыя рады, гасцям прапануюць цікавыя забавы. Завершыцца вечар Дня горада вялікім шоу з удзелам зорак эстрады і феерверкам.

Калі: 26 жніўня
Дзе: Салігорск, Мінская вобласць