Падзеі, факты, анонсы

Каляндар падзей у Беларусі: САКАВIК 2023

Мерапрыемства "Лошыцкая сядзіба ў ХІХ – пачатку ХХ стагоддзяў"

Адна з самых папулярных выдатных мясцін Мінска – Лошыцкая сядзіба – запрашае адправіцца ў музычнае падарожжа. У час экскурсіі па сядзібе наведвальнікі не толькі ўбачаць стылізаваныя інтэр'еры, у якіх жылі знакамітыя ўладальнікі Яўстафій Прушынскі, Іван і Яўстафій Любанскія, але і даведаюцца пра іх лёсы, прывычкі, уклад жыцця, сакрэты, якія захоўваюць гэтыя сцены. Музычнымі ілюстрацыямі да экскурсіі стануць паланэз дыпламата і кампазітара Міхала Клеафаса Агінскага "Развітанне з Радзімай", твор Напалеона Орды "Серэнада", п'еса са зборніка "Полацкі сшытак", творы нямецкага кампазітара-лірыка Іаганеса Брамса і рускага кампазітара-філосафа Аляксандра Скрабіна.

Калі: кожную нядзелю ў 15.00 і 17.00
Дзе: Музей "Лошыцкая сядзіба", праезд Чыжэўскіх, 10, Мінск

Выстава "Плады зямлі" ў Нацыянальным мастацкім музеі Беларусі

"Плады Зямлі" - маштабны выставачны праект, які асэнсоўвае паняцце пладоў як у прыватным значэнні - вынікі працы чалавека, народа, так і ў больш агульным, універсальным - божыя дары, сімвалы мудрасці, любові і радасці. У экспазіцыі - каля 40 твораў больш як 30 мастакоў Беларусі ад XVIII да канца XX стагоддзя з фондаў Нацыянальнага мастацкага музея. Выстава прадстаўляе некалькі раздзелаў - "Кветкі і плады", "Райскі сад", "Збор ураджаю", "Дыялог", "Жыццё на стале", "У стылі Сезана". Беларускія жывапісцы бачаць у пладах зямлі - прывычных яблыках, грушах, слівах, гарбузах - матывы для творчасці і эксперымента. Іх можна ўбачыць у цыклах яркіх нацюрмортаў Я.Раздзялоўскай, С.Катковай, В.Жолтак, рэалістычных работах Л.Журавовіч і Г.Шутава, метафізічных творах А.Кішчанкі і С.Цімохава.

Калі: 20 студзеня - 5 сакавіка
Дзе: Нацыянальны мастацкі музей, вул. Леніна, 20, Мінск

"Рытмы Афрыкі" ў Белдзяржцырку

Экзатычная праграма стартуе 4 лютага ў Белдзяржцырку: на гэты раз з зімовага Мінска гледачы перанясуцца ў самае сэрца гарачага афрыканскага кантынента! Гасцям трэба будзе зрабіць падарожжа ў новыя краіны, пазнаёміцца з карэннымі жыхарамі, даведацца аб іх талентах, здольнасцях, захапленнях і асаблівасцях жыцця ў гарачым клімаце. Выканаўцы праграмных нумароў - пераможцы прэстыжных цыркавых фестываляў і конкурсаў у Монтэ-Карла (Манака), Іспаніі, Францыі, краінах Лацінскай Амерыкі. У шоу "Рытмы Афрыкі" на мінскі манеж выйдуць акрабаты на вярблюдах, паветраныя гімнасты на мачце і рамянях, жанглёры, акрабаты ў кольцах, клоўны, а таксама стракатыя папугаі, дрэсіраваныя буйвалы... і нават мядзведзь!

Калі: 4 лютага - 23 красавіка
Дзе: Беларускі дзяржаўны цырк, пр. Незалежнасці, 32, Мінск

Выстава "Штучны інтэлект: мастак ці машына?" у НЦСМ

Упершыню ў Беларусі жыхары і госці сталіцы змогуць наведаць выставу мастацкіх твораў, цалкам створаных з дапамогай тэхналогій будучыні. У інавацыйную экспазіцыю ўвайшлі больш за 90 работ у 10 катэгорыях, што ахопліваюць такія аспекты светабудовы, як прырода, міфалогія, гісторыя, архітэктура... Кульмінацыяй праекта стане імерсіўны фільм Digital evolution ("Лічбавая эвалюцыя"), які ўяўляе сабой вобразнае пераасэнсаванне свету ідэй і свету матэрыі, вольнае мастацкае разважанне аб развіцці і эвалюцыі. Для займальнага азнаямлення з экспазіцыяй арганізатары стварылі тэматычны квест, а аматараў інста-эстэтыкі ў прасторы выставы чакаюць незвычайныя фотазоны.

Калі: 4 лютага - 9 красавіка
Дзе: Нацыянальны цэнтр сучасных мастацтваў, пр. Незалежнасці, 47, Мінск

Канцэрт Марыа Стэфана П'етрадаркі ў Магілёве

Марыа Стэфана П'етрадаркі - выдатны італьянскі музыкант, майстар ігры на акардэоне і банданеоне, лаўрэат мноства нацыянальных і міжнародных конкурсаў. На беларускай сцэне ён дэбютаваў у 2010-м, а ў ліпені 2022-га ўвайшоў у склад журы Міжнароднага конкурсу эстрадных выканаўцаў на "Славянскім базары" і ўпершыню "прагучаў" у дуэце з аркестрам народных інструментаў імя народнага артыста Беларусі Леаніда Іванова пад кіраўніцтвам дырыжора Дзяніса Чарты. У першы дзень вясны італьянскі выканаўца выступіць пад акампанемент заслужанага калектыву Беларусі з ужо любімай гледачамі праграмай у Магілёве.

Калі: 1 сакавіка
Дзе: Магілёўская абласная філармонія, вул. Першамайская, 10, Магілёў

Выстава навукова-тэхнічных дасягненняў "Беларусь інтэлектуальная" ў рэгіёнах

Электракары, ноўтбукі, беспілотнікі, касмічныя нанаспадарожнікі, лякарствы ад раку айчыннай вытворчасці - усё гэта прадставілі ў студзені на выставе навукова-тэхнічных дасягненняў "Беларусь інтэлектуальная" ў Мінску. Усяго за тры дні яе наведалі каля 30 тысяч чалавек, і ў сувязі з рэкорднай цікавасцю экспазіцыю ў сталіцы прадоўжылі яшчэ на тыдзень. З лютага 2023 года выставу могуць убачыць і ў рэгіёнах краіны. Напрыклад, у Гомелі толькі за 3 дні выстава прыняла больш за 50 тысяч наведвальнікаў! Тут можна азнаёміцца з дасягненнямі і распрацоўкамі вучоных НАН Беларусі, устаноў адукацыі, навукова-даследчых дзяржаўных і прыватных арганізацый, тэхнапаркаў. Увазе публікі прадстаўлены звыш 400 экспанатаў, сярод якіх натурныя ўзоры (у тым ліку буйнагабарытная тэхніка), макеты, мультымедыйныя прэзентацыі на вялікіх экранах.

Калі, дзе:
3-5 сакавіка - Віцебск, Футбольны манеж, пр. Генерала Люднікава, 12
16-19 сакавіка - Гродна, Лёгкаатлетычны манеж, вул. Камунальная, 3
24-26 сакавіка - Брэст, Лёгкаатлетычны манеж, вул. Маскоўская, 151

Свята рамеснікаў "Казюкі" ў Гродне

Рамесны кірмаш "Казюкі" ўжо на працягу дзясяткаў гадоў збірае больш за сотню народных умельцаў-носьбітаў самабытных традыцый з розных краін і гарадоў, а таксама аматараў эксклюзіўных рэчаў ручной работы. Яе гісторыя звязана з шанаваннем заступніка моладзі, майстроў і рамеснікаў Святога Казіміра (пры жыцці - княжыч і каралевіч Казімір Ягелон), дзень памяці якога прыпадае на 4 сакавіка. У кананічнай выяве святы трымае ў руках кветку лілеі або пальмавую галіну, таму адным з атрыбутаў-сімвалаў свята ў Беларусі з'яўляецца вярба, як у Вербную (Пальмавую) нядзелю. З мінулага года кірмаш "Казюкі" набыў новую асаблівасць - акцэнт на пэўны від традыцыйных рамёстваў. Так, галоўнай тэмай 2022-га стала мастацкая апрацоўка дрэва. Акрамя таго, з году ў год тут можна знайсці вырабы з гліны, саломы, скуры, металу, пацерак, шкла...

Калі: 4 сакавіка
Дзе: пл. Савецкая, Гродна

Канцэрт "Без жанчын жыць нельга на свеце!" у Вялікім тэатры Беларусі

Вялікі тэатр Беларусі запрашае гасцей на святочны канцэрт, прымеркаваны да Міжнароднага жаночага дня. Вядучыя салісты, лаўрэаты міжнародных конкурсаў пад акампанемент сімфанічнага аркестра на чале з дырыжорам Юрыем Караваевым выканаюць вядомыя арыі і дуэты з сусветнага рэпертуару. У праграме вечара прагучаць кампазіцыі І. Штрауса, І. Кальмана, Ж. Афенбаха, Р. Фальва, М. Ферылі, Л. Ардзіці, Ш. Гуно, Ф. Легара, Ч. Біксіа, А. П'яцолы, Л. Бернстайна... На галоўнай сцэне краіны гледачы ўбачаць сваіх любімых артыстаў, сярод якіх народныя артысты Беларусі Ніна Шарубіна, Уладзімір Громаў, Настасся Масквіна, заслужаныя артысты Беларусі Алена Бундзелева, Таццяна Траццяк, Аксана Якушэвіч, Станіслаў Трыфанаў, Андрэй Валенцій.

Калі: 4 сакавіка
Дзе: Вялікі тэатр Беларусі, пл. Парыжскай Камуны, 1, Мінск

XXV міжнародная архітэктурна-будаўнічая выстаўка BUDEXPO

BUDEXPO - маштабная падзея ў будаўнічай індустрыі і цэнтр прыцягнення для вядучых кампаній у гэтай сферы, якая дазваляе прадэманстраваць гасцям дасягненні і навінкі, знайсці новых партнёраў і заключыць кантракты. Мерапрыемства 25-ы раз аб'яднае лідараў галіны: забудоўшчыкаў і дэвелапераў, будаўніча-падрадныя арганізацыі, вытворцаў і пастаўшчыкоў абсталявання і матэрыялаў, архітэктурныя бюро і праектныя кампаніі. Выставачная пляцоўка дазваляе абмяняцца вопытам, абмеркаваць актуальныя праблемы, намеціць перспектывы далейшага развіцця прадпрыемстваў на будаўнічым рынку.

Калі: 15-17 сакавіка
Дзе: Нацыянальны выставачны цэнтр "БелЭкспа", пр. Пераможцаў, 14, Мінск

XVI Міжнародны маладзёжны тэатральны форум М@rt.кантакт у Магілёве

Маладзёжны тэатральны форум М@rt.кантакт вяртаецца на сцэнічныя пляцоўкі вясенняга Магілёва і запрашае да прагляду 19 спектакляў з 4 краін - Беларусі, Расіі, Казахстана і Балгарыі. Форум адкрыецца 20 сакавіка: у гэты вечар пакажуць спектакль "Карэніна" мінскага праекта "ТрыТфармат", які ў мінулым годзе заваяваў прыз глядацкіх сімпатый. Па жанравай разнастайнасці пастаноўкі вар'іруюцца ад класікі да арт-хауса. Самым доўгім спектаклем - а гэта каля 6 гадзін! - стане работа Гомельскага гарадскога маладзёжнага тэатра, якая складаецца з дзвюх частак: "451° па Фарэнгейце: шлях Кларысы" і "451° па Фарэнгейце: шлях Мілдрэд". Аснову форуму складуць спектаклі пра моладзь, для моладзі і з удзелам моладзі. Праграму дапоўняць майстар-класы, творчыя сустрэчы, майстэрні маладой рэжысуры. Таксама ўпершыню арганізатары фестывалю адкрыюць у драмтэатры новую арт-прастору.

Калі: 20-27 сакавіка
Дзе: Магілёўскі абласны драматычны тэатр, Магілёўскі абласны тэатр лялек, КЗ "Магілёў"

ХХХ Мінская міжнародная кніжная выстава-кірмаш

Буйнейшы кніжны форум Беларусі і СНД збярэ ў Мінску вядучых выдаўцоў, паліграфістаў і распаўсюджвальнікаў літаратуры. Галоўнай тэмай стане аб'яўлены ў Беларусі Год міру і стварэння. Таму назва выставы-кірмашу ў 2023-м сугучная закліку да аб'яднання - "Свет кнігі без меж". Нацыянальны стэнд прадставіць сучасныя тэндэнцыі ў кнігавыданні. А адной з асноўных пляцовак стане імправізаваная студыя, дзе нон-стоп будуць праводзіцца прэзентацыі новых кніжных праектаў у фармаце інтэрв'ю, дыялогаў, дыскусій з журналістамі вядучых СМІ.

У рамках асноўнай праграмы ММКВК адкрыюцца "Адукацыйны квартал" пры ўдзеле аўтараў вучэбнай, адукацыйнай, асветнай літаратуры, "Міжнародны квартал" з навінкамі замежнай літаратуры. Таксама пройдуць міжнародны сімпозіум літаратараў "Пісьменнік і час", прэзентацыя "Паліцы інтэлектуальных кніг", якія ў далейшым можна будзе набыць у кнігарнях, III літаратурны стартап ЛітUP, на ўдзел у якім паступіла ўжо больш за 200 заявак.

Калі: 22-26 сакавіка
Дзе: Нацыянальны выставачны комплекс "БелЭкспа", пр. Пераможцаў, 14, Мінск
Даведацца падрабязней

Вясенні абрад "Гуканне вясны" ў беларускім музеі-скансене

Меладычнымі песнямі-вяснянкамі, карагодамі і вясёлымі танцамі рыхтуецца сустрэць гасцей знакаміты музей-скансен у вёсцы Азярцо ("Строчыцы"). Кожны год тут праводзяць "Гуканне вясны" - самабытны і лірычны абрад зазывання гэтай чароўнай пары. Згодна са звычаем, клічуць вясну маладыя дзяўчаты, запрашаючы галоўную гераіню гуляння песнямі-вяснянкамі, а астатнія водзяць карагоды, гуляюць і смяюцца, заклікаючы сваёй весялосцю надыходзячую цёплую пару. Удзельнікі гулянняў катаюць па полі кола - каб год быў ураджайным, а зямля ўрадлівай і шчодрай, скачуць на дошках і высока падкідваюць выпечаных з цеста жаўрукоў - веснікаў вясны. Птушкі лічацца аднымі з галоўных сімвалаў свята, таму фігуркамі жаўрукоў, зробленымі з кардону, тканіны, каляровых стужак і нітак, жыхары вёсак спрадвеку ўпрыгожвалі дрэвы і дамы.

Калі: 26 сакавіка
Дзе: Беларускі дзяржаўны музей народнай архітэктуры і побыту, аг. Азярцо Мінскі раён

"Свята льну. Роднае Моднае": фестываль ільну ў Мінску

Лён з'яўляецца адным з самых пазнаваемых сімвалаў Беларусі, а яго блакітныя кветкі ёсць на дзяржаўным гербе. Рэспубліка ўваходзіць у сусветную дзясятку буйнейшых краін-вытворцаў ільнянога валакна. Лён-даўгунец вырошчваюць у 36 раёнах краіны, а пасяўная плошча лёну ў 2022 годзе, паводле даных статыстыкі, склала 44,3 тыс. га. А ў 2023-м у сталіцы ўпершыню правядуць маштабны фестываль ільну, дзе прадставяць навінкі да летняга сезона-2023 ад беларускіх ільнокамбінатаў і вядомых брэндаў лёгкай прамысловасці. "Свята льну. Роднае Моднае" стане працягам праекта "РОДНАЕ МОДНАЕ", які быў прэзентаваны ў 6 гарадах Беларусі ў рамках другога сезона рэспубліканскага фестывалю "Вытокі. Крок да Алімпу", а таксама на пляцоўцы міжнароднай выставы-кірмашу лёгкай прамысловасці BelTexIndustry-2022. У час свята падвядуць вынікі конкурсу сярод дызайнераў адзення, мастакоў па тканінах, аўтараў арт-аб'ектаў з ільну. Таксама ў праграме фестывалю - навучальныя семінары, майстар-класы, выставы і дэгустацыі.

Калі: 30 сакавіка - 1 красавіка
Дзе: Нацыянальны алімпійскі стадыён "Дынама", вул. Кірава, 8, Мінск