13 мая, Мінск /Юлія Огнева - БЕЛТА/. Рэгіянальны форум краін - удзельніц праекта "Адзін пояс, адзін шлях" - плануецца правесці ў Беларусі ў 2016 годзе, заявіў сёння прэм'ер-міністр Беларусі Андрэй Кабякоў на сустрэчы з намеснікам міністра камерцыі Кітая Чжун Шанем, перадае карэспандэнт БЕЛТА.
"Бакамі цяпер прапрацоўваецца пытанне правядзення ў Беларусі ў 2016 годзе рэгіянальнага форуму краін, якія ўдзельнічаюць у рэалізацыі канцэпцыі адзінага пояса Шаўковага шляху. У сувязі з гэтым хачу адзначыць, што міжрэгіянальнае гандлёва-эканамічнае супрацоўніцтва - гэта больш, чым рэалізацыя сумесных праектаў і пастаўкі тавараў. Гэта яшчэ і пытанні адкрытасці і ўзаемнага даверу паміж партнёрамі, сумесныя намаганні па дасягненні канкрэтных вынікаў работы і новых магчымасцей для бакоў", - сказаў Андрэй Кабякоў.
Кіраўнік беларускага ўрада канстатаваў, што апошнім часам пры актыўным удзеле ўрада КНР былі прыкладзены пэўныя намаганні для таго, каб цэнтр цяжару беларуска-кітайскіх адносін зрушыўся на інвестыцыйныя праекты. Паводле яго слоў, Беларусь па-ранейшаму разлічвае на дакладныя сігналы і аператыўную ініцыятыву з кітайскага боку, асабліва ў павелічэнні праектаў з удзелам прамых інвестыцый вялікіх высокатэхналагічных кітайскіх кампаній з сусветным імем. "З беларускага боку, дазвольце вас запэўніць, што ўрад гатовы забяспечыць максімальна зручныя ўмовы для практычнай рэалізацыі ўсіх двухбаковых праектаў, а таксама для напаўнення нашых гандлёва-эканамічных адносін канкрэтным зместам", - сказаў Андрэй Кабякоў.
У сваю чаргу Чжун Шань падзякаваў Андрэю Кабякову за сардэчны прыём і выказаў надзею на далейшае плённае супрацоўніцтва дзвюх краін.