Падзеі, факты, анонсы
Фін Яні Рыта стаў аўтарам першага гола XIII Каляднага хакейнага турніру ў Мінску
4 студзеня, Мінск /Кар. БЕЛТА/. Форвард каманды Фінляндыі Яні Рыта стаў аўтарам першага гола XIII Каляднага міжнароднага турніру аматараў хакея на прыз Прэзідэнта Беларусі. Фінскі нападаючы адкрыў лік на 5-й хвіліне сустрэчы з камандай Германіі, паведамляе карэспандэнт БЕЛТА.
У стартавым матчы на малой пляцоўцы "Чыжоўка-Арэны" фінскія хакеісты ўжо ў першым перыядзе зрабілі добры лік - 4:1. У далейшым скандынаўская каманда дамінавала і заслужана перамагла з лікам 11:3. У іншым матчы папярэдняй групы В хакеісты Славакіі згуляюць з камандай Расіі (пачатак у 15.30).
Каманды групы А будуць гуляць на галоўнай пляцоўцы "Чыжоўка-Арэны". Швейцарскія хакеісты ў 13.00 пачалі сустрэчу з дэбютантам Каляднага турніру - камандай Балкан. Вечарам, пасля ўрачыстай цырымоніі адкрыцця, якая пачнецца ў 17.30, на лёд выйдзе дружына Прэзідэнта Беларусі, сапернікам якой будзе каманда з Аб'яднаных Арабскіх Эміратаў (19.00).
Як і ў мінулыя гады, спачатку каманды правядуць матчы ў двух квартэтах, пасля чаго адбудуцца стыкавыя сустрэчы: пераможцы груп 7 студзеня сустрэнуцца ў вырашальным паядынку за галоўны прыз, а другія каманды разыграюць бронзу. Усе гульні пройдуць на пляцоўках "Чыжоўка-Арэны", уваход на трыбуны свабодны.
версія для друку
зрабіць стартавай
дабавіць у выбранае