Афіцыйны сайт Рэспублікі Беларусь
Навіны
Выдатныя мясціны Беларусі
Каляндар падзей у Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Навіны | Падзеі, факты, анонсы

Падзеі, факты, анонсы

6 Jan 2015

Фестываль праваслаўных песнапенняў "Каложскі благавест" адбудзецца 11-14 лютага ў Гродне

6 студзеня, Гродна /Таццяна Вішнеўская - БЕЛТА/. XIV Міжнародны фестываль праваслаўных песнапенняў "Каложскі благавест" пройдзе ў Гродне 11-14 лютага. Аб гэтым карэспандэнту БЕЛТА паведаміў дырэктар фестывалю Уладзімір Лябецкі.

Ужо вызначаны ў цэлым замежныя і беларускія ўдзельнікі фестывалю, іх будзе каля 20. У гэтым годзе, як чакаецца, у Гродна прыедуць калектывы з Румыніі, Польшчы, Літвы, Украіны, Расіі. Упершыню ў геаграфіі краін - удзельніц фестывалю - Малдова, якая прадставіць на конкурс адразу два калектывы: царкоўны і свецкі. Даволі шырока будуць прадстаўлены і беларускія, асабліва сталічныя калектывы: у конкурснай праграме выступяць хары дзіцячых нядзельных школ, прыходскія хары і ансамблі, аматарскія дзіцячыя і дарослыя калектывы. Запрошаны да ўдзелу хор інжынерных войскаў РФ "За веру і айчыну", хор студэнтаў Беларускай дзяржаўнай акадэміі музыкі. Па традыцыі пачэсным госцем фестывалю становіцца калектыў - уладальнік Гран-пры мінулагодняга фестывалю, аднак у гэтым годзе ўжо вядома, што ўладальнік Гран-пры 2014 года, хор студэнтаў Казанскай дзяржаўнай кансерваторыі (акадэміі) імя Н.Г.Жыганава (Расія), прыехаць у Гродна не зможа.

Усяго ў конкурснай праграме міжнароднага фестывалю прымуць удзел амаль 40 калектываў як свецкіх, так і царкоўных.

Пачынаючы з 8 студзеня, на працягу чатырох дзён адбудуцца адборачныя туры, па выніках якіх вызначацца ўдзельнікі фінальных фестывальных мерапрыемстваў ад Гродзенскай праваслаўнай епархіі. Адборачныя праслухоўванні пройдуць у Свіслачы, Росі, Мастах і Азёрах. Конкурсныя праслухоўванні традыцыйна пройдуць у гродзенскім Свята-Пакроўскім саборы, пазаконкурсныя канцэрты - у прыходскім комплексе і Гродзенскім музычным каледжы.

Як паведаміў Уладзімір Лябецкі, цяпер фарміруецца праграма фестывальных мерапрыемстваў. Традыцыйна яны пачнуцца загадзя, увогуле фестываль будзе доўжыцца прыкладна тыдзень. Паводле папярэдняй інфармацыі, ужо 8 лютага пры прыходзе Царквы святых Барыса і Глеба (Каложскай) адкрыецца выстаўка ікон сучасных іканапісцаў. Наведвальнікі змогуць убачыць іконы работы майстроў з Беларусі, Літвы, Польшчы, Украіны. У час фестывалю адбудуцца таксама фотавыстаўка, пройдуць кіналекторыі, вечары духоўнай паэзіі і аўтарскай песні. Адбудзецца прэзентацыя ўнікальнай і папулярнай кнігі-альбома мастацтвазнаўца Алены Шацько "Званы праваслаўных храмаў Заходняй Беларусі".

Першы фестываль "Каложскі благавест" прайшоў у 2002 годзе, ён быў прымеркаваны да 10-годдзя адраджэння Гродзенскай епархіі. У 2011 годзе Міністэрства культуры Беларусі прысвоіла фестывалю статус міжнароднага. Арганізатарамі фестывалю выступаюць Гродзенская праваслаўная епархія і Гродзенскі аблвыканкам. У склад міжнароднага журы ўваходзяць свяшчэннаслужыцелі са спецыяльнай музычнай адукацыяй, выкладчыкі вышэйшых музычных устаноў Беларусі, Расіі, Францыі, Румыніі, кампазітары, хормайстры, кіраўнікі харавых калектываў розных краін. Пераможцаў вызначаюць па васьмі намінацыях.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі