Падзеі, факты, анонсы

24 верасня, Мінск /Кар. БЕЛТА/. Чатырохразовая алімпійская чэмпіёнка ў біятлоне Дар'я Домрачава прыняла ўдзел у трэніроўцы каратэ ў праекце Bright Team фонду "Дырэкцыя II Еўрапейскіх гульняў 2019 года", паведамляе карэспандэнт БЕЛТА.

Занятак праводзіўся ў зале кафедры спартыўна-баявых адзінаборстваў і спецпадрыхтоўкі Беларускага дзяржаўнага ўніверсітэта фізічнай культуры пад кіраўніцтвам майстра баявых мастацтваў, уладальніка другога дана па каратэ, сяміразовага чэмпіёна краіны Андрэя Грыневіча. Пасля інтэнсіўнай размінкі ўдзельнікаў трэніроўкі азнаёмілі з асновамі каратэ.

"Гэты від спорту ўваходзіць у праграму II Еўрапейскіх гульняў, але нямногія ведаюць, што каратэ будзе прадстаўлена і на Алімпійскіх гульнях у Токіа. Мне вельмі спадабалася, як праходзіў занятак: усё інтэнсіўна, некаторыя практыкаванні, на мой погляд, былі б карыснымі для біятланістаў. Буду рада, калі мяне запросяць прыняць удзел у трэніроўках і па іншых відах спорту", - адзначыла Дар'я Домрачава.

Разам з Дар'яй Домрачавай на татамі сёння выйшлі Тэа, Ганна Шалюціна і іншыя прадстаўнікі шоу-бізнесу. Падтрымалі зорак і прадстаўнікі фонду. Намеснік дырэктара Фонду Анатоль Котаў адзначыў, што дырэкцыя мае намер і далей праводзіць такія трэніроўкі па розных відах спорту.

Адной з галоўных мэт праекта Bright Team з'яўляецца папулярызацыя відаў спорту, уключаных у праграму маючага адбыцца мультыспартыўнага форуму. Праект стартаваў 1 жніўня таварыскім турнірам па пляжным футболе, які з поспехам прайшоў на пляцоўцы спартыўна-аздараўленчага комплексу "Алімпійскі" беларускай сталіцы. Таксама адбылася зорная трэніроўка па дзюдо пад кіраўніцтвам чэмпіёнкі Еўропы Марыны Слуцкай, сустрэча па баскетболе Bright 3x3 Basketball. Каманда дырэкцыі таксама паўдзельнічала ў заездах на 12-мясцовых кітайскіх лодках-байдарках на "Зорнай рэгаце" ў час фізкультурна-спартыўнага свята, прымеркаванага да чарговай гадавіны з дня заснавання беларускай сталіцы, і ў Мінскім паўмарафоне-2018. Нядаўна ўдзельнікі Bright Team азнаёміліся з відам спорту, які ўваходзіць у культурную праграму II Еўрапейскіх гульняў, - петанкам. Праект прадугледжвае далейшае правядзенне сустрэч.