Падзеі, факты, анонсы

25 чэрвеня, Мінск /Кар. БЕЛТА/. Беларускія студэнты змогуць вучыцца ў Еўрапейскай школе ў Тбілісі. Аб гэтым у эфіры тэлеканала "Беларусь 1" заявіў еўракамісар па еўрапейскай палітыцы суседства і перагаворах аб пашырэнні ЕС Ёханес Хан, паведамляе БЕЛТА.

"Хутка мы адкрыем першую Еўрапейскую школу ў Тбілісі, у якой могуць і будуць навучацца вучні і студэнты з Беларусі. І калі гэты пілотны праект будзе паспяховым, а я глыбока ўпэўнены ў тым, што так і будзе, мы можам яго прадубліраваць у іншых краінах і сталіцах", - сказаў Ёханес Хан.

Ён адзначыў, што інвесціраванне ў моладзь - адзін са шляхоў дасягнення 20 канкрэтных задач, якія былі вызначаны на саміце "Усходняга партнёрства", праведзеным у 2017 годзе ў Бруселі. "Гэтыя задачы ўяўляюць сабой канкрэтныя дзеянні, напрыклад, у галіне ўзаемазвязанасці, спалучэння аўтамабільных трас у рэгіёне з аўтатрасамі ў Еўрапейскім саюзе. Тое ж самае датычыцца чыгунак", - падкрэсліў еўракамісар.

Паводле слоў Ёханеса Хана, адным з важных вынікаў чарговага раўнда нефармальных міністэрскіх дыялогаў краін - удзельніц ініцыятывы ЕС "Усходняе партнёрства", які прайшоў у Мінску 21 чэрвеня, стала рашэнне распрацаваць да канца бягучага года "дарожную карту" дзяржаў УП. Прадугледжваецца, што ў якасці першага кроку будзе заключэнне рэгіянальнага пагаднення, якое датычыцца зніжэння тарыфаў на роўмінг. Другім крокам можа стаць распрацоўка такога пагаднення з Еўрапейскім саюзам. "Гэта няпростая задача, паколькі трэба знайсці кампраміс паміж інтарэсамі кліентаў і аператараў, а кампаніі на гэтым рынку арыентаваны на прыбытак. Але калі мы імкнёмся пашырыць магчымасці, зніжэнне кошту паслуг сувязі - адзін са спосабаў збліжэння людзей", - растлумачыў ён.

"Таму я магу сказаць, што чакаецца шмат канкрэтных дзеянняў. Сярод іх прадастаўленне малым і сярэднім прадпрыемствам доступу да крэдытаў у мясцовай валюце за кошт фінансавых сродкаў Еўрапейскага саюза. Такое крэдытаванне мае вялікае значэнне, паколькі яно пашырыць магчымасці малых і сярэдніх прадпрыемстваў для атрымання фінансавай дапамогі для сваёй дзейнасці. І калі гаварыць аб аб'ёмах экспарту з краін "Усходняга партнёрства" ў Еўрапейскі саюз, можна канстатаваць, што дасягнуты значны прагрэс", - дадаў Ёханес Хан.