Падзеі, факты, анонсы

4 лютага, Мінск /Кар. БЕЛТА/. Важнымі ў 2015 годзе стануць вынікі выступленняў беларускіх атлетаў на чэмпіянатах свету па 17 відах спорту, дзе будуць разыграны ліцэнзіі на летнюю Алімпіяду-2016. Аб гэтым сёння заявіў міністр спорту і турызму Беларусі Аляксандр Шамко, выступаючы на пасяджэнні калегіі ведамства, прысвечаным падвядзенню вынікаў работы галіны за 2014 год і задачам на бягучы год, перадае карэспандэнт БЕЛТА.

Згодна з агучанымі міністрам данымі, у 2014 годзе прадстаўнікі Беларусі на Алімпійскіх гульнях, чэмпіянатах, Кубках, пяршынствах свету і Еўропы сумарна заваявалі 558 медалёў (у 2013 годзе - 520 медалёў): 158 залатых, 175 сярэбраных і 225 бронзавых. Немалаважна, што 15 узнагарод трапілі ў беларускую медальную скарбонку па выніках зімовай Алімпіяды і чэмпіянатаў свету ў алімпійскіх дысцыплінах, падкрэсліў Аляксандр Шамко. Менавіта Гульні ў расійскім Сочы сталі галоўным стартам мінулага года, дзе беларускія спартсмены дасягнулі найвышэйшага выніку за час выступленняў на зімовых Алімпіядах у суверэннай гісторыі, а таксама ў складах зборнай СССР. Было заваявана шэсць медалёў, з якіх пяць - залатыя. Неаспрэчным дасягненнем з'яўляецца і тое, што ў неафіцыйным камандным заліку па якасці заваяваных узнагарод Беларусь упершыню ўвайшла ў дзясятку мацнейшых краін свету, заняўшы 8-е месца.

Кіраўнік спартыўнай галіны крытычна ацаніў той факт, што пры наяўнасці створанай інфраструктуры для падрыхтоўкі спартыўнага рэзерву і спартсменаў высокага класа ў лядовых відах, на Алімпійскія гульні ў Сочы не змаглі адабрацца беларускія канькабежцы. Таксама, паводле слоў Аляксандра Шамко, перарвана дынаміка прадстаўніцтва на Алімпіядах і айчынных фігурыстаў. Гаворачы аб спартыўным рэзерве, ён адзначыў, што не былі дасягнуты мэтавыя паказчыкі па заваяванні медалёў на пяршынствах свету і Еўропы зборнымі камандамі па спартыўнай гімнастыцы, кулявой стральбе, снаўбордзе, настольным тэнісе, конным спорце, хакеі на траве. "Заваявалі медалі, але не ў поўнай меры справіліся з пастаўленай задачай зборныя каманды па боксе, дзюдо, цяжкай атлетыцы, таэквандо, стральбе з лука, скачках на батуце, біятлоне, тэнісе. Знізіўся спартыўны рэзультат на міжнароднай арэне адносна 2013 года ў спартыўнага рэзерву ў акадэмічным веславанні, лёгкай атлетыцы, сучасным пяцібор'і, веласпорце", - канстатаваў Аляксандр Шамко.

Міністр таксама назваў тройку лепшых рэгіёнаў краіны, арганізацыі фізічнай культуры і спорту якіх унеслі найбольшы ўклад у падрыхтоўку спартсменаў высокага класа. У аснову ацэнак пакладзены вынікі атлетаў гэтых арганізацый, паказаныя на буйнейшых міжнародных спартыўных спаборніцтвах (Алімпійскіх гульнях, чэмпіянатах, пяршынствах, Кубках свету і Еўропы). Першае месца заняў горад Мінск (5 296 ачкоў). Другое месца ў Гомельскай вобласці (3 515 ачкоў), трэцяе - у Мінскай вобласці (2 053 ачкі).

Не пакінуў без увагі Аляксандр Шамко і мінулагоднюю дынаміку прысваення спартыўных званняў за дасягнутыя высокія вынікі. Так, званне "Майстар спорту Рэспублікі Беларусь міжнароднага класа" прысвоено 138 спартсменам, у тым ліку 98 - у алімпійскіх відах спорту (71 працэнт). Званне "Майстар спорту Рэспублікі Беларусь" - 867 спартсменам, з іх 518 - у алімпійскіх відах спорту (59 працэнтаў).

Да станоўчых момантаў мінулага года на калегіі Мінспорту быў аднесены і факт павелічэння колькасці жыхароў рэспублікі, якія займаюцца фізічнымі практыкаваннямі і спортам. Цяпер гэта лічба складае 1,8 млн чалавек, або 19 працэнтаў насельніцтва краіны. У 2010 годзе было 1,6 млн чалавек, або 16,6 працэнта.