Падзеі, факты, анонсы

Беларускія лёгкаатлеты выйгралі тры ўзнагароды на турнірах у Чэхіі і Германіі

Максім Недасекаў. Фота з архiва

9 верасня, Мінск /Кар. БЕЛТА/. На спаборніцтвах у Остраве (Чэхія) перамогу святкаваў скакун у вышыню Максім Недасекаў. У Дэсау (Германія) золата выйграла бар'ерыстка Эльвіра Герман, а бронза на рахунку скакухі ў даўжыню Настассі Мірончык-Івановай, паведамілі БЕЛТА ў прэс-службе БФЛА.

Старт у чэшскім горадзе Острава праходзіў у статусе залатога этапу World Athletics Continental Tour. Перамогу Максіму Недасекаву прынесла ўзяцце вышыні 2,24 м. Другое месца ў гэтым відзе праграмы заняў прадстаўнік Літвы Андрус Грыбаўскас - 2,20 м. Бронзавая ўзнагарода на рахунку італьянца Джанмарка Тамберы - 2,20. Яго сярэбраны медаліст спаборніцтваў апярэдзіў па колькасці спроб.

На бронзавым этапе World Athletics Continental Tour у нямецкім горадзе Дэсау Эльвіра Герман выйграла фінальны забег на 100 м з бар'ерамі, паказаўшы рэзультат 12,85 сек. Другое месца заняла амерыканка Чадвік Пэйтан - 13,00 сек. Фінская спартсменка Лота Харала прыбегла да фінішу трэцяй з падагульняючым часам 13,19 сек.

У сектары для скачкоў у даўжыню Настасся Мірончык-Іванова ў чацвёртай спробе прадэманстравала рэзультат 6,72 м. Ён прынёс ёй бронзавую ўзнагароду. Наперадзе ўраджэнкі Слуцка старты завяршылі нямецкая спартсменка Малаіка Міхамба і ўкраінка Марына Бех-Раманчук. Дзеючая чэмпіёнка свету з Германіі са спробай на 7,03 м не толькі выйграла спаборніцтвы, але і ўзначаліла топ-ліст рэзультатаў сезона. Украінка ў сваім лепшым скачку паляцела на 6,85 м.

версія для друку

зрабіць стартавай

дабавіць у выбранае