Падзеі, факты, анонсы

16 мая, Мінск /Кар. БЕЛТА/. Беларуска Дар'я Скрыпнік заняла пятае месца ў вагавой катэгорыі да 52 кг на Гран-пры па дзюдо ў Алматы, паведамляе карэспандэнт БЕЛТА.

Бронзавы прызёр чэмпіянату свету 2015 года пачала выступленне на турніры з перамогі па ачках над інданезійкай Дэві Тудам і полькай Каралінай Пянькоўскай. У паўфінале беларуска ўступіла вопытнай спартсменцы з Ізраіля Гілі Коэн, якая завяршыла паядынак чыстай перамогай, атрымаўшы ацэнку іпон. У барацьбе за трэцяе месца Дар'я Скрыпнік не змагла нічога проціпаставіць Агаце Перэнц з Польшчы. Саперніца беларускі ў ходзе паядынку атрымала ацэнкі вазары і шыдо. У выніку Скрыпнік стала пятай. Два іншыя прадстаўнікі зборнай Беларусі Арыф Багіраў (60 кг) і Марына Слуцкая (+78 кг) у васьмёрку мацнейшых не трапілі.

Удзел вядучых беларускіх дзюдаістаў у буйных міжнародных турнірах дае магчымасць ім зарабляць ачкі, якія будуць улічвацца пры размеркаванні алімпійскіх квот на падставе рэйтынгу па стане на 30 мая. Спачатку будуць названы па 22 барцы ў мужчын і па 14 у жанчын у кожнай вагавой катэгорыі, потым на падставе агульнага рэйтынгу будуць размеркаваны кантынентальныя квоты. Найбольш высокі алімпійскі рэйтынг сярод беларусаў мае Дзмітрый Шэршань - у катэгорыі да 66 кг ён займае 10-е месца.