Падзеі, факты, анонсы
Балельшчыкі змогуць убачыць матчы мінскага чэмпіянату Еўропы па індархакеі сярод жанчын бясплатна
19 студзеня, Мінск /Кар. БЕЛТА/. Балельшчыкі змогуць убачыць матчы чэмпіянату Еўропы па індархакеі сярод жаночых каманд бясплатна. Аб гэтым карэспандэнту БЕЛТА паведамілі ў Беларускай федэрацыі хакея на траве.
Усе матчы па індархакеі (хакей на траве ў закрытых памяшканнях) адбудуцца ў сталічным Палацы спорту, у якім абсталявана спецыяльная пляцоўка для правядзення спаборніцтваў. У кантынентальным форуме ў Мінску прымуць удзел восем мацнейшых нацыянальных каманд Старога Свету.
Жаночая зборная Беларусі правяла ўзмоцненую падрыхтоўку да чэмпіянату пад кіраўніцтвам галандскага спецыяліста Хермана Крэйса, у тым ліку і вучэбна-трэніровачны збор у Нідэрландах, які прайшоў у пачатку студзеня. Паводле слоў трэнерскага штаба, хакеісткі падыходзяць да маючага адбыцца дамашняга турніру ў добрых кандыцыях і аптымальным складзе. Аднавіўся пасля траўмы адзін з лепшых снайпераў зборнай Юлія Міхейчык, нязначная траўма рукі не перашкодзіць і другому лідару дружыны - Хрысціне Папковай - выйсці на пляцоўку ў наступны ўік-энд.
Першыя трэніроўкі ў Палацы спорту адбудуцца 20 студзеня, а вечарам таго ж дня запланавана таварыская сустрэча Нідэрланды - Аўстрыя.
На чэмпіянаце Еўропы ў элітным дывізіёне сярод жаночых нацыянальных каманд беларускія хакеісткі згуляюць на папярэднім этапе ў групе В 22 студзеня з Германіяй (13.30) і Украінай (19.30), 23 студзеня - з Аўстрыяй (12.30).
У групе А выступяць Нідэрланды, Польшча, Чэхія, Бельгія. Дзве лепшыя каманды з кожнай групы выйдуць у паўфінал, які адбудзецца вечарам 23 студзеня. Матч за 3-е месца і фінал - 24 студзеня. Тэлеканал "Беларусь 5" правядзе прамыя трансляцыі матчаў з удзелам зборнай Беларусі, таксама ў эфіры пакажуць самыя цікавыя гульні групавога раўнда і вырашальныя процістаянні за размеркаванне падагульняючых месц у фінальнай частцы турніру.
Па выніках кантынентальнага форуму шэсць зборных атрымаюць права на ўдзел у чэмпіянаце свету 2018 года, які пройдзе ў аргенцінскім горадзе Расарыа.
На мінулым чэмпіянаце Еўропы 2014 года ў Празе беларускі занялі шостае месца. Найбольшага поспеху жаночая зборная дабілася ў 2012-м і 2008-м, калі на кантынентальным форуме ў Лейпцыгу (2012 год) і іспанскай Алмерыі (2008 год) заняла другое месца, абодва разы ў фінале ўступіўшы Германіі (2:3 у серыі пенальці) і (1:5).
версія для друку
зрабіць стартавай
дабавіць у выбранае